Unë shkruaj

Në vëmendje të zotit Nishani


Bëhu pjesë e Grupit Zyrtar të Opinion.al
>> KËTU <<
               Publikuar në : 12:03 - 01/09/15 |
root

Nga Artur Zheji

Është e vërtetë zoti Nishani, ashtu si edhe ua kemi shkruar në një mesazh personal, edhe unë drejtori i gazetës Mapo, ashtu edhe kryeredaktori Arion Sulo, që në faqen tonë on line, për disa orë qarkulloi një lajm krejt i pasaktë, në lidhje me ju.

Dukuria e re, e lajmeve gazetareske “on line”, bën që për arsye ngutjeje, të ndodhë shpesh që burimet e informacioneve në qarkullim të mos konsultohen në standardin e duhur dhe kësisoj, aksidenti ndodh. Mirëpo është gjithsesi në logjikën e lajmit on line dhe të faqes on line, që, me të njëjtën shpejtësi që ndodh aksidenti, po aq shpejt edhe “korrigjohet” duke u hequr lajmi i pabazuar nga qarkullimi.

Kjo padyshim nuk zvogëlon apo shmang përgjegjësinë tonë si gazetarë, për të cilën ne si një media me prestigj të konfirmuar publik, zoti Nishani, ju kërkojmë pa droje dhe pa rezerva, një ndjesë publike për atë që ndodhi.

Ju pra, ashtu si thuhet në deklaratën e Presidencës, nuk keni pushuar as edhe një orë të vetme në jahtin luksoz të Babait të Emirit të Katarit.

Personalisht, mendoj se, edhe nëse do të kishit pirë një çaj apo kafe kortezie në jahtin e famshëm, nuk do të kishit konsumuar përveç çajit apo kafes dhe kortezisë presidenciale, ndonjë mëkat të posaçëm. Por kjo është një çështje tjetër.

Lajmi u tranzitua në të paktën 6 apo 7 faqe on line atë ditë dhe sipas raportimit që m’u bë, në kthim nga pushimet, u kopjua në mënyrë automatike, pa shtuar as komente, shpoti, apo nëntekste ironike.

Bën habi në të njëjtën kohë zoti Nishani, që zyra juaj e vëmendshme, ka veçuar në deklaratën e saj të ashpër, vetëm Median Mapo.

Përtej miklimit që kjo na shkakton si një media shumë e vizituar dhe referenciale për Presidencën dhe jo vetëm, aty nuk përmendej asnjë media tjetër on line, për këtë mëkat të ngjashëm.

Kjo është e para.

E dyta, dhe aspak më e parëndësishmja, është gjuha e përdorur në paragrafët e deklaratës së Presidencës, e sidomos në paragrafin e parafundit dhe të fundit të saj.

Citoj: “Zyra e shtypit e Presidentit të Republikës shpreh keqardhjen për këtë shpërdorim vulgar të medias për shërbime qeveritare”.

Mbasi citoj dhe mbasi kam bërë parashtrimin e mësipërm dhe mbasi ua kemi dërguar mesazhet sqaruese edhe në mënyrë personale, më lind e drejta të pyes se:

Çfarë përfitimi do të kishte qeveria shqiptare nga lajmi aksidental se keni pushuar disa ditë (gjë që nuk është e vërtetë) në jahtin e Babait të Emirit të Katarit, që është një mik i vyer i Shqipërisë dhe të cilin ju e shoqëruat me respekt të veçantë në vizitën që ai bëri në qytetin e Gjirokastrës?!

A nuk është kjo, pra, një yshtje pak sa e papeshuar mirë, nga shkronjësi i Zyrës suaj të Shtypit? Sepse shqiptarisht, ashtu si “miku i shqiptarëve”, babai i Emirit apo Emiri vetë, mund të flejë lirisht në tokë shqiptare, në mënyrë reciproke mund të flihet edhe në jahtin e tij, që është provizorisht shtëpia e tij lundruese (gjë që nuk është e vërtetë).

Një aksident pra, që realisht nuk duhet të ndodhte, nuk mund të etiketohet nga shkronjësi me zell të tepruar, me shpresë që ju nuk e keni miratuar me vëmendje, “si një shpërdorim vulgar” dhe aq më tepër në “shërbim të…”

Ndërsa në paragrafin e fundit thuhet e lexohet me çudi akoma më të madhe:

Institucioni i Presidentit të Republikës rezervon të drejtën për t’iu drejtuar gjykatës për këtë shpifje dhe denigrim të figurës së Kreut të Shtetit.

Shtrohet përsëri një pyetje e natyrshme dhe logjike, zoti Nishani:

Si është e mundur që të denigrohet figura e Kreut të Shtetit, kur një lajm aksidental, që thotë, le ta zëmë pra, se për dy-tri ditë ju paskeni qenë mysafir mbi këtë anije, (që nuk është e vërtetë), të denigrohet kështu figura juaj?

A nuk ka frikë shkronjësi zellmadh e penëshkurtër, që kjo deklaratë bie edhe në dorën e Babait të nderuar, të Emirit të nderuar të Katarit,  Mik i Shqipërisë?

Se pra, nëse babai i Emirit do t’ju kishte ftuar të kalonit qoftë edhe një natë në atë anije, ju do të refuzonit për të mos u denigruar?

Nga se, nga kush dhe pse?!

Nuk po zgjatem më, sepse përshkallëzimi logjik i ideve mund të na çonte në një “incident diplomatik” aspak të dëshiruar për dy arsye:

E para, sepse Katari dhe Emiri i tij, ka bërë dhe priret të bëjë investime të rëndësishme në Shqipëri.

E dyta, sepse nuk do të doja asesi, që për faj të një shkronjësi, që duket se lexon vetëm gazetën Mapo dhe faqen e saj on line, e pra një fans i hapur apo i fshehtë i yni, por gjithsesi në shkarje të ndjeshme peshoreje, të lëndohej apo aq më tepër të dëmtohej sadopak lobimi që edhe keni bërë në Gjirokastër me Babain e nderuar, të Emirit të nderuar, të Katarit, vend mik!

Zoti Nishani, si një mik i juaji, ju përsëris gjithsesi ndjesën tonë për lajmin e pasaktë, i cili pati ndër ne një jetëgjatësi vetëm disaorëshe.

Gjithashtu ju siguroj që media Mapo, për sa kohë unë e drejtoj atë, nuk ka patur dhe nuk do të ketë ndonjë qëllim denigrues për personin tuaj.

Por gjithsesi, si një gazetar i vjetër në këtë Fshat të Madh ku jetojmë, mendoj se shkronjësi i zyrës së shtypit është nxituar dhe ka përdorur një dorë të rëndë denigruese dhe amatoreske ndaj gabimit aksidental të faqes sonë on line.

Miqësisht dhe në pritje të një kafeje kortezie,

KOMENTO (0)

Shkruaj nje koment

    Pas