Mbrëmjen e kësaj të enjteje, më 2 prill, në emisionin “Opinion” në Tv Klan, pjesa e parë dhe e dytë u përqendrua mbi një alert të lëshuar ditën e djeshme nga Ambasada e SHBA-ve në Tiranë për qytetarët amerikanë në Shqipëri. Sipas këtij paralajmërimi, “grupet e lidhura me Iranin mund të shënjestrojnë subjekte të lidhura me Shtetet e Bashkuara ose elementë të opozitës iraniane në Shqipëri.”
Ky paralajmërim u kthye në temën kryesore të debatit edhe në Parlamentin shqiptar. Mundësia e një sulmi iranian ndaj Shqipërisë është diskutuar edhe më parë, sidomos pas sulmeve kibernetike të përsëritura. Debati u përqendrua në pyetjet kryesore: A ishte ky një paralajmërim rutinë, si ato gjatë protestave të opozitës, apo një kërcënim serioz që nuk duhet neglizhuar? A mund të ndodhë një sulm direkt nga Irani, apo bëhet fjalë për akte të tjera terroriste?
Në studion e emisionit kjo temë u diskutua nga shtatë të ftuar: Fatjona Mejdini, Juxhina Sotiri, Baton Haxhiu, Artan Hoxha, Ermal Jauri, Redi Shehu dhe Mentor Nazarko.
