-Manjola Bregasi
Atëherë kur dukej se nuk do të ndodhte, pa shumë bujë e paralajmërime opozita deklaron nisjen e protestës.
Atë që nuk e zgjoi as çështja Tahiri dhe as akuzat e forta të narkotrafikut shtetëror duket se po e sjell çështja e Kryeprokurorit që po kthehet në kalin e betejës mes socialistëve dhe opozitës.
Pas largimit nga çdo proces votimi apo komision lidhur me zgjedhjen e Kryeprokurorit, pas një mbledhjeje me drejtuesit e Partisë Demokratike në rrethe, pasditen e së shtunës Lulzim Basha deklaroi një protestë që do të mbahet të hënën në orën 10:00 brenda dhe jashtë parlamentit, sikurse e cilësoi.
Është pikërisht e hëna dita kur mazhoranca vendosi të votojë një nga tre kandidaturat për emrin e Prokurorit të Përgjithshëm të Përkohshëm, pa konsensusin e PD dhe LSI që vendosën të mos marrin pjesë në votim. Njëkohësisht këtë vendim mori edhe PDIU, e cila përfaqësohet me tre deputetë në Parlamentin shqiptar.
Por të hënën pritet të finalizohet edhe një hap tjetër i rëndësishëm lidhur me krijimin e KLP-së, institucioni i ri i dalë nga vetingu, që do të zgjedhë Prokurorin e Përgjithshëm, tashmë jo të përkohshëm, por me mandat.
Shoqëria civile, e cila deri tani kishte bllokuar ngritjen e KLP-së duke mos çuar emrin e propozuar prej saj, befas deklaron mbrëmjen e së shtunës vonë, tre kandidaturat e saj çka na bën të mendojmë që veç një prokurori të përkohshëm që sipas zërave pritet të jetë një grua, (nëse votimi do të bëhet) të hënën do të kemi edhe emrat për një KLP që i hap rrugën zgjedhjes së Kryeprokurorit me mandat, sipas procedurave të dala nga vetingu.
E ndërsa është ende i paqartë nguti i Ramës për një Prokuror të Përkohshëm, opozita nga ana e saj e ka bërë të qartë se votimi i Kryeprokurorit është antikushtetues, një thikë që Rama po ja fut vetes dhe që do të destabilizojë vendin.
Çfarë ka dashur të thotë Basha me këtë deklaratë dhe a do të ketë opozita një strategji më afatgjatë për protestën që parashikon të nisë?
“Ditën e hënë do të tregojmë jemi apo jo opozitë fasadë”, është shprehur Basha duke lënë të besohet se përtej protestës ai ka një platformë për të ditur se ku do të mbërrijë.
Ndërkohë, Lëvizja Socialiste për Integrim që gjithashtu ka kundërshtuar hapur çdo hap të mazhorancës për zgjedhjen e Kryeprorkurorit, ka deklaruar mbledhjen e Këshillit Drejtues Kombëtar sot në orën 11:00, duke lënë të besojmë që edhe ajo do të jetë pjesë e protestës, ndersa vete Kryemadhi eshte shprehur ne FB mbi kete organizim.
Në një kohë kur opozita ka përballë mazhorancën që kalkulon votat, (të cilat i mjaftojnë për të zgjedhur Kryeprokurorin) dhe Basha ka kundër Ambasadorin Amerikan në këtë çështje, ajo që të gjithë pyesin është e thjeshtë: A do të shkojë protesta e opozitës përtej zgjedhjes së Kryeprokurorit nëse arrin ta pengojë atë?
