Prokurori i Apelit Shkodër, Arben Dollapaj, njëherazi dhe anëtar i Këshillit të Lartë të Prokurorisë doli sot në seancë në shkallën e dytë të vettingut pasi vendimi për konfirmimin e tij në shkallën e parë u apelua nga Komisioneri Publik.
Dollapaj u konfirmua në detyrë nga Komisioni i Pavarur i Kualifikimit (KPK) por Komisioneri Publik e ankimoi vendimin, duke kërkuar që Kolegji i Posacëm i Apelimit (KPA) të kryejë një hetim të thelluar të pasurisë së tij çka nuk është bërë sipas tij në shkallën e parë të vettingut.
Në seancën e sotme, Komisioneri Publik tha se prokurori Arben Dollapaj ka tri pasuri të paluajtshme, një apartament në Bajram Curri, një shtëpi në Valbonë dhe një shtëpi në Selitë, në Tiranë. Ai kërkoi hetim më të thelluar për banesën në Valbonë dhe atë në Selitë.
Në parashtrimin e tij Komisioneri tha se shtëpia në Valbonë sipas disa denoncimeve është përshtatur për hoteleri por prokurori e hodhi poshtë këtë akuzë. Ndërsa për banesën në Selitë, Komisioneri Publik ka dyshime se çmimi mund të jetë favorizues. Megjithatë Dollapaj përmes avokatit të tij tha se këtë banesë vëllai i tij e ka blerë tek një shtetas kosovarë madje më shtrenjtë se vlera reale.
Në dy kriteret e tjera, atë të pastërtisë së figurës dhe anës profesionale, prokurori Dollapaj doli i pastër.
Prokurori Dollapaj u transferua në Shkodër në kohën që në krye të organit të akuzës ishte Adriarik Llalla me të cilin pati përplasje. Ai ka patur në shqyrtim çështje të rëndësishme si ajo e “Bandës së Lushnjes” ku ka kërkuar burgosjen e të pandehurve. Për të njëjtën çështje ka punuar edhe ish-prokurori Besnik Muçi i cili u shkarkua pak kohë më parë nga KPA pasi Komisioneri Publik kishte apeluar konfirmimin e tij në detyrë. Shkarkimi i Muçit u kërkua gjithashtu për çështje pasurie, akuza të cilat krijuan debat mbi ndershmërinë e procesit. Ai mori më shumë vëmendje pasi u shkarkua në një kohë që ishte emëruar gjyqtar në Gjykatën Kushtetuese. /Opinion.al
