Politikë

Spiropali shkon në Holandë për tu lutur dhe t’i kërkojë ndihmë bizneseve


               Publikuar në : 20:54 - 04/12/19 |
Al Do

Ministrja e Shtetit dhe Marrëdhënieve me Parlamentin Elisa Spiropali, së bashku me ministrin e Diasporës Pandeli Majko ndodhen në Holandë.

Sipas një postimi në Facebook-un e Spiropalit ata janë atje në kuadër të një takimi të organizuar nga Ambasada e Shqipërisë në Holandë dhe Dhoma e Tregtisë së Diasporës.

Në këtë takim, për të cilin nuk ka asnjë informacion në faqen zyrtare të Ambasadës Shqiptare në Holandë, përfaqësuesit e qeverisë shqiptare janë takuar, sipas ministres Spiropali, “me përfaqësues të njohur të biznesit holandez në fushën e ndërtimit, inovacionit, turizmit dhe energjisë, të cilët iu përgjigjën ftesës sonë për të ndarë eksperiencat dhe përvojat e tyre të vyera në përballimin e fatkeqësive natyore, si dhe për të biseduar për #ProgramineRindërtimit që do të nisë #shumëshpejt zbatimin në zonat e prekura nga tërmeti.”

Adresimi i nevojës për asistencë me grupe ekspertësh, fonde monetare dhe logjistikë inovative nga Holanda, për të ndihmuar në jetësimin e programit dinjitoz të rindërtimit, ishte fokusi i këtij takimi intensiv pune.”, mbyll Spiropali postimin e parë në Facebook për këtë takim.

Kapërcimi nga takimi me përfaqësues të bizneseve holandeze në fatkeqësinë që solli tërmeti është mbresëlënës.

Së pari, përballimi i fatkeqësive natyrore në Holandë nuk bëhet nga bizneset por nga shteti.

Së dyti, nga sa shkruhet në postim lihet të kuptohet se biznesmenëve në fushën e ndërtimit, inovacionit, turizmit dhe energjisë i është kërkuar asistencë me grupe ekspertësh, fonde monetare dhe logjistikë inovative. Domethënë bizneseve i është kërkuar të kryejnë shërbime në Shqipëri dhe për këtë jo vetëm të mos paguhen por edhe të bëjnë bamirësi përderisa kërkohet asistencë me fonde monetare. Nuk jepet informacion se cilat janë këto biznese të cilat janë të gatshme të bëjnë këtë bamirësi për një vend në të cilin nuk kanë investuar as në kohën kur nuk ka qenë në gjendje të jashtëzakonshme.

Së treti, e vetmja fatkeqësi natyrore me të cilën mund të përballet Holanda janë përmbytjet dhe kjo është zgjidhur me anë të një sistemi digash që është i famshëm në të gjithë botën. Prej dekadash atje nuk ka patur më fatkeqësi natyrore kështu që dhe eksperiencat në përballimin e tyre janë të pakta, aq më tepër për bizneset.

Përpos lajmit për këtë takim, Ministrja Spiropali bën me dije se ka vizituar edhe një kishë në Hagë ku është lutur për të prekurit nga tërmeti. Pra në një gjendje të jashtëzakonshme, kur kryeministri Rama kërkoi disa herë të falur për shkëputjen 48 orëshe për të qenë prezent në samitin e NATO-s, ministres së shtetit dhe ministrit të Diasporës i duhet të shkojnë në Holandë për tu lutur.

Prej disa ditësh, në mbledhjen e këshillit të ministrave, Kryeministri Rama ka folur mbi shkurtimet që do të bëhen në buxhet për të alokuar fonde për të përballuar situatën nga tërmeti. Ai bllokoi blerjen e makinave dhe mobilieve për bashkitë për gjithë vitin e ardhshëm, madje sot u bë publik urdhri në Policinë e Shkodrës ku policët urdhërohen të japin një pjesë të rrogës si bamirësi por nuk është parë e arsyeshme që të kursehen fondet e vizitës së Spiropalit dhe Majkos që të luten në Holandë dhe ti kërkojnë ndihmë bizneseve. /Opinion.al

Pas