Skenari më i mirë që mund të shpresojë Shqipëria për qëndrimin e Gjermanisë në lidhje me çeljen e negociatave për anëtarësim është ‘një po me kushte’ sipas gazetarit të DW.
Ai raportoi se ende nuk ka një qëndrim të qartë për Shqipërinë por “burime pranë DW thonë se drita jeshile për Shqipërinë mund të jepet vetëm me kushte. Madje flitet për një dokument që po qarkullon në Berlin që thotë se Shqipëria duhet të plotësojë 9 kushte për hapjen e negociatave. Ky dokument është hartuar nga deputetë të grupit parlamentar qeverisës CDU/CSU”
Budestagu gjerman do të marrë më 26 shtator vendimin për dhënien ose jo të dritës jeshile për Shqipërinë në procesin e negociatave. Kushtet që diskutohen se mund ti vendosen Shqipërisë kanë të bëjnë me vënien në funksion të gjykatës së Lartë dhe Kushtetuese, hartimin dhe implementimin e reformës zgjedhore, ndjekjen penalisht të gjykatësve dhe prokurorëve që nuk kanë kaluar vetingun si dhe ata që janë përfshirë në shit-blerjen e votave. Bundestagu do të kërkojë rezultate konkrete në luftën kundër korrupsionit dhe të sqarohet ligjshmëria e zgjedhjeve lokale të 30 qershorit.
Meqenëse këto kushte nuk mund të plotësohen deri më 26 shtator, “mundësia më e mirë për Shqipërinë është një po me kushte” tha gazetari i DW.
Ai shtoi gjithashtu se ky është vetëm qëndrimi i Gjermanisë pasi vende të tjera si Franca janë shprehur gjithashtu skeptike përsa i përket politikës së zgjerimi të Bashkimit Europian. /Opinon.al
