Pasi vrau me sëpatë gruan e tij dhe u vetëdorëzua në polici, 73 vjeçari Veli Dervishi ka dëshmuar në rajon për motivin e krimit, por i moshuari duket të ketë dhënë alibi të ndryshme përpara policisë dhe përpara trupit gjykues.
Ndryshe nga ç’kishte dëshmuar në postën policore të Golemit se e vraru gruan pasi i kërkonte llogari, duke shtuar se edhe tradhtia e gruas e kishte shtyrë të kryente krimin, Dervishi ka dhënë një tjetër alibi përpara trupit gjykues të Gjykatës së Krimeve të Rënda.
Kjo e fundit e ka lënë në burg burrin që masakroi gruan në një banesë në Golem, ku çifti kishte shkuar me pushime.
Autori ka pranuar para trupit gjykues se ishte ai që e vrau, por duke u justifikuar se ishte gruaja që do e qëllonte e para me sëpatë.
“Kishim konflikte prej kohësh. Ditën e ngjarjes ajo deshi të më qëllonte me sëpatë. Unë ia mora nga duart dhe i rashë” ka thënë ai.
Pasi ka dëgjuar palët, trupi gjykues vendosi të lërë në masën e sigurisë “arrest me burg” autorin.
Në 46 vite martesë, bashkëshortët kishin qenë tri herë në prag divorci, pasi viktima donte të ndahej nga autori për shkak të tradhtive të tij. Por ka qenë ndërhyrja e tre djemve që i ka bashkuar ata sërish, duke mos i lejuar të ndaheshin.
Sapo ka kryer krimin, ai i ka telefonuar njërit prej djemve që jetojnë në Tiranë dhe i ka thënë se kishte vrarë nënën e tij. “Hajde shpejt në Golem. Kam vrarë nënën tënde…”.
