Aktualitet

Sterkaj: Duhet një fond special, deputetët të heqin diçka nga rroga


               Publikuar në : 12:53 - 22/09/19 |
Al Do

Deputeti i Shkodrës, Paulin Sterkaj propozoi sot gjatë mbledhjes së grupit socialist që të krijohet një fond i veçantë për rastet e tërmeteve madje duke reduktuar gjithashtu rrogën e deputetëve për të kontribuuar në të.

“Qeveritë duhet të kenë një fond special sepse jemi në një zonë sizmike. Isha 18 vjeç kur ndodhi në Shkodër dhe e kam përjetuar. Them se ka ardhur koha për një fond të tillë, që të mos i shtrijmë dorën askujt dhe të veprojmë me fondet tona. Duke filluar nga ne deputetët, nga administrate, të lëmë një kontribut nga rroga, por edhe nga të ardhurat e taksave që merr shteti, të ndahet një fond special” tha Sterkaj.

Ai shtoi gjithashtu se duhet të angazhohen specialistë nga ministritë përkatëse për të bërë një propagandë në televizion për të informuar opinionin publik i cili ka kaluar një gjendje paniku.

“Ministrat përkatës duhet të gjejnë specialistët e duhur, duhet të bëjnë një propaganda reale publikut të gjerë se janë dëmtu pak banesa por psikologjikisht është dëmtu cdo fëmi nga tmerri dhe paniku i tërmeteve. Më mirë do ishte një solidaritet me specialistët e fushës në televizione, se sa mund të bëjmë ne si deputet propagandën” tha Sterkaj.

Kryeministri Rama u përgjigj duke thënë se fondi është ekzistues dhe për raste më të rënda se sa ky që kaloi.

“Fatmirësisht, me këtë masë dëmesh jemi të qetë nga kapaciteti mbulues financiar. E thashë që në hyrje se Ministria e Financave i ka bërë skenarët, duke parashikuar një skenar shumë më të keq. Ndërsa kur tërmetet e kalojnë kufirin e të papërballueshmes, edhe shtetet e mëdha i drejtohen solidaritetit ndërkombëtar. Kjo është dhe arsyeja që dje më kanë marrë në telefon kryeministri i Italisë, Presidenti i Francës dhe kancelarja austriake”, tha Rama. /Opinion.al

Pas