Riviera Dedaj
Me mijëra rumunë u mbodhën të premten në sheshin Viktoria të Bukureshtit në një protestë madhështore kundër qeverisë, kundër akteve korruptive, etj. Lajmi i kësaj proteste u përcoll edhe nga mediat në Shqipëri. Të shumtë janë shqiptarët që komentojnë në rrjetet sociale, që jo vetëm lëvdojnë rumunët, por madje kërkojnë “t’ju vjedhin protestën”.
Shikojeni këtë pankartë (fotoja kryesore). Aty shkruhet: Ne’sjemi Shqipëria!
E po kjo foto që po shpërndahet me shpejtësi të rrjetet sociale, facebook e intagram është e manipuluar.
Opinion.al ju sjell foton origjinale, ku një rumune, protestuese, mban pankartën “drejtësi e pa korruptuar”.
Se si NE shqiptarët bëjmë opozitë, revoltohemi kundër qeverisë vetëm pas tastierës së telefonit e kompjuterit, e tregon më së miri protesta për Teatrin, ku nuk mblidhen më shumë se 20-30 veta, ndërsa për protestën e rumunëve shqiptarët janë të ekzaltuar! A nuk ka arsye për të protestuar në Shqipëri? Pse duhet të shohim turmën e njerëzve në Rumani për të kujtuar se çfarë do të thotë të rebelohesh ndaj atyre që ti vetë i ke zgjedhur (votuar).
Demokracia njeh zgjedhjen e qeverisë me votë dhe rrëzimin e saj jo vetëm në fund të mandatit, por edhe në mes të saj, nëse nuk përmbush premtimet e objektivat. Nëse populli sheh padrejtësi, korrupsion, taksa të larta, mungese rendi e sigurie, etj.
Pse rruga e vetme që shihet sot është emigrimi? Kjo tregohet më së miri nga shifrat e kërkesave për azil të shqiptarëve në Gjermani, Francë, etj. Kjo shihet edhe nga numri i madh i aplikimeve për lotarinë amerikane. Të gjithë duan të ikin dhe pakkush mendon se mund ta gjejë të ardhmen në tokën e tij. Është për tu habitur, se jo vetëm në rrjetet sociale, por edhe në biseda private me miq dhe të afërm një pjesë e mirë e tyre, e shfaqin pakënaqësinë.
Qoftë ata që merren me biznes, që janë të pakënaqur me shtimin e taksave dhe TVSH-në. Po kështu sot paguajnë të gjithë më shtrenjtë faturën e ujit të pijshëm dhe të energjisë elektrike. Shohim sorollatjen në zyrat e shtetit, rryshfetin, punësimet me mik e parti, etj, etj. por këto “nuk” mjaftojnë, por shohim si protestojnë rumunët.
Çfarë duhet të ndodhë në këtë vend që njerëzit të mos manipulojnë pankartat e rumunëve, por të ngrihen, të kërkojnë të jetojnë më mirë në vendin e tyre?!
/Opinion.al
