Lira, monedha turke ka pësuar rënien më të madhe që njeh historia. Sakaq, Banka qendrore e Turqisë ka nisur planin e stabilitetit ekonomik. Ndërsa ministri i Financave Berat Albayrak e përshkroi rënien e lirës si një “sulm” nga forcat e jashtme.
Banka qendrore e Turqisë njoftoi të hënën se po merrte të gjitha masat e nevojshme për të siguruar stabilitetin financiar pas rënies së Lirës, duke premtuar të ofronte “të gjithë likuiditetin që bankat kanë nevojë”.
Monedha turke arriti një rekord të ulët prej 7.24 kundrejt Dollarit amerikan në tregtinë e Azisë së Paqësorit, kur tregjet u hapën të hënën në mëngjes. Monedha ka humbur më shumë se 45 për qind të vlerës së saj këtë vit.
Shqetësimet rreth ndikimit të Presidentit Rexhep Tajip Erdogan mbi ekonominë, duke përfshirë thirrjet e tij të përsëritura për normat e ulëta të interesit përballë inflacionit të lartë dhe marredheniet e përkeqësuara të Turqisë me Shtetet e Bashkuara kanë ndikuar në rënien e madhe.
“Banka qendrore do të monitorojë nga afër tregun dhe formacionet e çmimeve, dhe do të marrë të gjitha masat e nevojshme për të ruajtur stabilitetin financiar, nëse konsiderohet e nevojshme”, tha Banka e Turqisë në një deklaratë per mediat.
“Është e qartë se situata e Turqisë është një tjetër rrezik global”, tha Konstantinos Anthis, kreu I ADS. Sipas tij efekti zinxhirë mund të shkojë deri në Meksikë.
“Edhe pse vetë Turqia ka lidhje të kufizuara me pjesën tjetër të botës, një përhapje e krizës në Evropë nëpërmjet ekspozimit të bankave të saj është një shqetësim i madh”, tha më tej ai.
Në një intervistë me gazetën Hurriyet të dielën, ministri i financave Berat Albayrak e përshkroi rënien e lirës si “një sulm”, duke i bërë jehonë komenteve të fundit nga Erdogan.
Nderkohe, Ministria e Brendshme e Turqisë tha të hënën se po merrte masat e nevojshme ligjore kundër postimeve të mediave sociale në lidhje me kursin e këmbimit të dollarit që krijon një perceptim negativ të ekonomisë së Turqisë.
Sipas Ministrisë së Brendshme, 346 llogari në rrjete sociale që komentojnë për dobësimin e lirës “në një mënyrë provokuese” janë identifikuar që nga 7 gushti dhe ka nisur veprimi ligjor për ti mbyllur ato.
Ndersa, ministri Albayrak hodhi poshtë çdo sugjerim se Turqia mund të ndërhyjë në llogaritë bankare në dollarë, duke thënë se çdo konfiskim ose konvertim i këtyre depozitave në Lira nuk ishte zgjidhje.
Komentet e Erdoganit mbi normat e interesit, së bashku me emërimin e dhëndrit të tij Albayrak, si ministër i Financave kanë intensifikuar shqetësimet se banka qendrore nuk është e pavarur.
Duke folur për përkrahësit në Trabzon, Erdogan hodhi poshtë sugjerimet se Turqia ishte në një krizë financiare, siç janë parë në Azi dy dekada më parë. Ai tha se rënia e Lirës është shkaktuar nga një komplot dhe nuk pasqyronte gjendjen ekonomike të vendit.
“Kjo është stuhi në gotë uji”, ka thënë ai, duke shtuar se nuk jemi në krizë ekonomike, por është operacion i huaj që po ndërmeret kundër Turqisë.
“Po u drejtohem specifikisht prodhuesve tanë: Mos nxitoni në banka për të blerë dollarë. Mos merrni një qendrim duke thënë ‘Ne jemi të falimentuar, ne jemi të mbaruar!’ Duhet ta dini se për ta mbajtur këtë komb në këmbë ekonomikisht na duheni ju prodhuesit”, ka deklaruar Presidenti Erdogan.
Marre nga Aljazeera.com
Ne shqip: Opinion.al
