Përplasja ligjore mes organeve shtetërore dhe kompanive private që operojnë në malin e Tomorrit mesa duket do të vazhdojë pavarësisht vendimit të Gjykatës Administrative të Apelit në favor të këtyre të fundit. Ministri i Turizmit dhe Mjedisit, Blendi Klosi ka deklaruar se mali i Tomorrit do të shpallet Park Kombëtar duke zgjeruar hartën e mbrojtjes së tij.
“Do të marrim një vendim të shpejtë të Këshillit Kombëtar të Rregullimit të Territorit për të miratuar zgjerimit të hartës së Parkut Kombëtar, do të marrim një vendim qeverie për ta rishpallur Park Kombëtar, pasi hilet e gjykatave për të zgjatur me vite, do ta shkatërronte përfundimisht atë zonë, duke e bërë të parikuperueshme”, tha Klosi.
Qytetarë të qarkut të Beratit kane nisur mbledhjen e firmave për shpalljen e malit të Tomorrit, Park Kombëtar. Ndërsa Ministria e Turizmit dhe Mjedisit ka vendosur të ankimojë vendimin e Gjykatës Administrative të Apelit megjithatë kjo procedurë do të kërkojë funksionimin e Gjykatës Kushtetuese e cila ende nuk ka një afat se kur do të rifillojë punën.
Apel për mbrojtjen e trashëgimisë natyrore të malit të Tomorrit kanë bërë edhe ekspertë të mjedisit dhe pedagogë të Fakultetit të Shkencave të Natyrës gjatë një dëgjese në lidhje me këtë çështje.
“Shumë pjesë të këtij mali mbetën jashtë zonës dhe pastaj u masakruan. Sigurisht këtu kanë përgjegjësi ligjore personat që kanë firmosur në dokumentet e ndikimit në mjedis”, tha Ferdinand Bego, zv.Dekan i Fakultetit të Shkencave të Natyrës.
Gjykata Administrative e Apelit në Tiranë rrëzoi më 2 gusht të këtij viti Vendimin e Këshillit të Ministrave për shpalljen e malit të Tomorrit “Park Kombëtar”. Ky vendim duhet ti hapte rrugë funksionimit të guroreve në zonë të cilave i është pezulluar aktiviteti prej 22 muajsh por mesa duket ata do të presin deri në momentin që për këtë çështje të shprehet Gjykata Kushtetuese. Një tentativë e pronarëve të këtyre kompanive për të rifilluar dy javë më parë punë u bllokua nga policia. /Opinion.al
