Një nga kushtet që DW raportoi se priten ti vendosen Shqipërisë për çeljen e negociatave për anëtarësim ishte dhe ndëshkimi i figurave të përfshira në korrupsion dhe krime elektorale. Deputetja Rudian Hajdari ka folur në lidhje me këtë kërkesë dhe deklaroi në një intervistë për ABC News se pala gjermane ka kërkuar ndjekje penale dhe ndëshkim të figurave në nivelin më të lartë politik.
Ajo cilësoi se pala gjermane nuk ka përmendur emra por ka bërë të qartë se ndëshkimet duhet të vijnë nga nivelet më të larta. Ndër të tjera deputetja e Hajdari tha se është shumë e rëndësishme çuarja para e reformës në drejtësi dhe asaj zgjedhore ku ajo është bashkë-kryetare komisioni në Parlament.
Rudina Hajdari: Mos harrojmë se krahas reformës zgjedhore, na ndan një muaj nga vendimi i çeljes së negociatave i cili do vijë me kushte të qarta. Ju e patë qartë sot, ishin nëntë kushte dhe një nga kushtet ishte shumë i qartë. Jo në mënyrën e nëntë kushteve pra të detajuara në atë lloj mënyre, por gjithë kohës, sidomos pala gjermane, kanë kërkuar që të ketë ndëshkime ndaj figurave politike që janë të korruptuar apo që janë akuzuar për vjedhje votash. Kanë kërkuar që të ketë ndjekje penale ndaj figurave të rëndësishme politike.
Mirela Milori: Do vendosen kushte për çeljen e negociatave për figura të rëndësishme do të kërkohet ndjekje penale? Në takimet që keni pasur ky ka qenë konteksti?
Rudina Hajdari: Kanë kërkuar që të ketë ndjekje penale dhe ndëshkim të figurave në nivel më të lartë politik, jo vetëm në nivelet e mesme të administratës shtetërore.
Mirela Milori: Çfarë kuptoni me nivel të lartë politik?
Rudina Hajdari: Në funksionet më të larta.
Mirela Milori: Ministra?
Rudina Hajdari: Kjo është një gjë për t’u parë. Nëse rezultojnë të tillë persona të cilët kanë një precedent penal, atëherë patjetër që do ketë ndjekje penale dhe hetim të mëtejshëm në lidhje me këta persona. /Opinion.al
