Aktualitet

Palmer për Shqipërinë: SHBA nuk zgjedhin fitues dhe humbës në politikë


               Publikuar në : 22:50 - 18/09/19 |
Al Do

Përfaqësuesi i veçantë i SHBA për Ballkanin Perëndimor, Mathew Palmer ka folur në lidhje me krizën politike në Shqipëri.

Në një intervistë për Zërin e Amerikës Palmer deklaroi se Shtetet e Bashkuara të Amerikës nuk zgjedhin fitues dhe humbës në lojën politike. Ai theksoi se aktualisht SHBA ka një partneritet të mirë dhe të ngushtë me qeverinë siç ka patur edhe me atë të mëparshme. Palmer nënvizoi se dalja nga zgjedhjet demokratike është kusht i një qeverie për të punuar me SHBA.

“Ne do të donim që ngërçi i tanishëm politik në Shqipëri të zgjidhej. Ne kemi një partneritet të mirë e të ngushtë me qeverinë aktuale të Shqipërisë ashtu siç kemi pasur një partneritet të mirë e të ngushtë me qeverinë e mëparshme. Shtetet e Bashkuara nuk zgjedhin fitues dhe humbës në lojën politike, askund, dhe veçanërisht në Ballkanin Perëndimor, ku jam duke u përpjekur të bëj punën time. Ne punojmë me qeveritë që dalin përmes zgjedhjeve demokratike” tha Palmer

Ai shtoi se mbështet dialogun mes palëve për të ndërmarrë reformën zgjedhore me rekomandimet e OSBE-së, ndërsa në lidhje me zgjidhjen e mosmarrëveshjeve politike theksoi si shumë të rëndësishme ngritjen e Gjykatës Kushtetuese.

“Ne i kuptojmë dëshirat e opozitës për të parë zbatimin e reformave dhe e mbështesim qëllimin e reformave. OSBE-ja ka bërë rekomandime shumë specifike në lidhje me reformën zgjedhore në Shqipëri. Ne do të dëshironim të shihnim një dialog midis qeverisë dhe opozitës për këto reforma, dhe, kur kjo marrëveshje të arrihet, do të dëshironim që zgjedhjet e ardhshme të zhvillohen mbi këtë bazë. Ndërkohë, është e rëndësishme që Shqipëria të krijojë një Gjykatë Kushtetuese në mënyrë që ajo të gjykojë mosmarrëveshjet që do të lindnin në sferën politike. Por, mbi të gjitha, dhe kjo është shumë e rëndësishme, populli i Shqipërisë mund të mbështetet tek miqësia dhe partneriteti me Shtetet e Bashkuara. Aleatët tanë, partnerët tanë janë Shqipëria dhe populli shqiptar. Politika është politikë, por marrëdhënia midis Shteteve të Bashkuara dhe Shqipërisë është e fortë dhe e qëndrueshme” deklaroi Palmer. /Opinion.al

Pas