Politikë

Erion Veliaj komenton vendimin e Këshillit të Evropës


               Publikuar në : 21:59 - 26/06/19 |
Al Do

Lajmi se Këshilli i Evropës nuk do të dërgonte vëzhgues për zgjedhjet e 30 qershorit në Shqipëria ishte hera e parë që një përfaqësi ndërkombëtare shprehej kritike ndaj standardit demokratik të tyre. Në lidhje me këtë lajm pati shumë reagime si nga opozita ashtu dhe nga përfaqësues të mazhorancës.

Zëvendës ministri i Mbrojtjes Petro Koçi e quajti këtë vendim të influencuar nga rikthimi i Rusisë në Këshill. Për ministrin e Jashtëm në detyrë Gent Cakaj ishte thjesht një problem logjistik dhe jo i ndonjë rëndësie të madhe.

Nga ana tjetër kryetari i opozitës Lulzim Basha deklaroi se ky vendim nuk ishte marrë kurrë që nga koha e rënies së komunizmit. Sipas tij ky ishte një mesazh i qartë politik për qeverinë e vendit. Kryeministri ju përgjigj në Twitter duke i thënë se kjo ishte një gënjeshtër dhe se e vërteta do të dalë shpejt.

Për të treguar të vërtetën mendoi kryebashkiaku i Tiranës, Erion Veliaj. Në një takim elektoral sot në Tiranë Veliaj tentoi të shpjegojë se si ishte e vërteta e vendimit të Këshillit Evropian. Ai tha se së pari nuk kemi të bëjmë me vendim të Këshillit të Evropës por me një trupë vullnetare brenda Këshillit të Evropës, që quhet Kongresi i Autoriteteve Vendore.

“Nga e di unë këtë? Se unë si kryetar i bashkive të Shqipërisë jam përfaqësues i Shqipërisë në këtë Kongres, por Luli s’ka si ta dijë këtë se kur ishte kryetar bashkie, jo që s’dinte ku binte Kongresi, nuk dinte ku binte Sahati, shkolla, ku binte kopshti, çerdhja” tha Veliaj.

Më tej ai shtoi se e gjitha kjo kishte ndodhur pasi ky grup ishte trembur sipas tij nga situata në Shqipëri dhe për të mos rrezikuar veten e tyre kishin vendosur të mos vinin si vëzhgues në zgjedhje. Për këtë fajtore ai bëri opozitën me imazhin e keq që ajo i ka dhënë vendit përtej kufijëve. Megjithatë Veliaj i qetësoi qytetarët duke i thënë se ai kishte folur në telefon me Kongresin dhe i kishte sqaruar se në Shqipëri çdo gjë ishte normale dhe se mund të vinin të qetë. Pas këtij sqarimi ata kishin rënë dakort që ta kthenin vendimin e tyre dhe të vinin në Shqipëri.

“Çfarë ndodhi? Duke qenë se pjesë e delegacionit që kryesoj unë në Kongresin e Këshillit të Evropës, pra në këtë trupë, brenda një institucioni që ka disa organizma kishin marrë gjithashtu informacion nga Voltana dhe kur marrin informacion nga bashkiakë të tjerë që thonë: Ne këtu ju presim me zjarr, ju presim me gurë, ju qëllojmë me fishekzjarrë, ata thanë, dy duar për një kokë, nëse kjo e çmenduara të vret, pse të shkojmë? Pasi fola me përfaqësuesit e Kongresit dhe pasi u thashë që ne shqiptarët nuk jemi të dhunshëm, një grup i vogël kryetarësh bashkie që djegin shkolla nuk përfaqëson bujarinë dhe mikpritjen shqiptare, edhe Kongresi i Këshillit të Evropës do të jetë këtë fundjavë në Tiranë për të vëzhguar zgjedhjet”, tha Veliaj.

Por pothuajse rreth të njëjtës orë që Veliaj bëri këtë sqarim të të vërtetës, në media doli deklarata e vetë Presidentit të Kongresit të pushtetit vendor në Këshillin e Europës, Anders Knape. Ai jo vetëm që nuk tha se KiE ka kthyer vendimin e do të vijë në Shqipëri por ishte shumë i qartë në kritikën e tij ndaj standardit demokratik të zgjedhjeve të 30 qershorit. Ne nuk vëzhgojmë zgjedhje pa opozitë. Ky ishte mesazhi i presidentit Knape.

“Misionet e Kongresit bazohen në vëzhgimin e zgjedhjeve lokale dhe rajonale me pjesëmarrje të gjerë të forcave të ndryshme politike të një vendi, dhe kështu Kongresi asnjëherë nuk ka vëzhguar zgjedhje pa pjesëmarrjen kuptimplotë të opozitës” thuhet në deklaratën e tij.

Më këtë ai i qetësoi të gjitha ujërat që ishin trazuar që nga mëngjesi lidhur me vërtetësinë dhe prapavijën e këtij vendimi. Kryebashkiaku Veliaj duhet të dalë e të sqarojë elektoratin e tij tashmë se me kë ka folur vërtetë në telefon pasi një gjë është e qartë, në zgjedhjet e 30 qershorit, si asnjëherë më parë gjatë 30 viteve pluralizëm Këshilli i Evropës nuk do të sjellë vëzhgues. /Opinion.al

 

 

Pas