Corriere: Fëmijët fantazmë të Ballkanit

FIRENCE- Gazeta më e madhe italiane ‘Corriere della Serra’ në faqen online ka postuar një reportazh me titull nga Ballkani në Firence, udhëtimi i fëmijëve fantazmë. Bëhet fjalë për dhjetra fëmijë dhe adoleshentë nga Bosnja dhe Kosova që udhëtojnë drejt Italisë për një të ardhme më të mirë. Paradoksi, sipas gazetës italiane, qëndron në faktin se udhëtimi i tyre bëhet me bekimin e familjes, e cila u paguan trafikantëve 2000-2500 Euro.
“Corriere Della Sera” ka realizuar intervista me këta fëmijë (duke u fshehur identitetin) për të zbuluar rrugën që ndiqet nga trafikantët. Sipas ‘Corriere’-s, këta fëmijë të moshës 14-18 vjeç po rriten nga shteti italian por në disa raste perfundojnë edhe në rrugë.
“Prindërit e mi kanë paguar për të më dërguar në Itali dy mijë euro. Udhëtova një javë për të arritur këtu, kam ndryshuar disa makina. Nga Kosova në Serbi, e pas kaluam në një vend të quajtur Subotica në kufi mes Serbisë e Hungarisë. Kaluam kufirin e Hungarisë në këmbë, pastaj nga Austria në Slloveni me makinë. Unë nuk e di kush ishte shoferi i makinës”. Kështu e përshkruan udhëtimin një 17 vjeçar nga Kosova. “Në Kosovë ka një varfëri të madhe. Nuk ka punë. Ne duam të hipim në një avion e të vijnë në Evropë, por nuk na lejohet. Dhe jemi të detyruar të paguajnë për këto udhëtime të gjata me makina. Kishim shumë frikë gjatë rrugës. Pjesa më e vështirë është kufiri me Hungarinë, mua më arrestuan, qëndrova dy ditë në burg e më pas erdhi më morri një shofer tjetër”, tregon një tjetër i mitur.
Trafikantët “i stabilizojnë” këta fëmijë në Itali duke i lënë në rrugë. Eshtë policia ajo që i merr dhe i çon në qendrat e përkujdesjes së fëmijëve. “Kur vijnë në qendër këta fëmijë regjistrohen në shkollë, ne kujdesemi për ta, e nëse ata qëndrojnë sipas rregullave të vendit kanë mundësi të fitojnë një leje qëndrimi”, thotë Marliena Machia drejtore e Qendrës së Pritjes së fëmijëve në Firence ne reportazhin e “Corriere della Sera”.