Katër persona janë arrestuar nga policia e Lezhës pasi akuzohen për kultivim të lëndëve narkotike dhe armëmbajtje pa leje.
Bëhet me dije se ka rënë në pranga shtetasi Zef Donaj, banues në Lalm Lukaj, pasi është kapur në kushtet e flagrancës, duke tentuar të kultivojë bimë narkotike kannabis sativa tek stani i tij në këtë fshat.
Po u bë arrestimi në flagrancë i Pashk Gjini, banues në lagjen “Skënderbeg” Lezhë, pasi në bahçen e tij iu gjetën të kultivuar fidanë të dyshuar kanabisi. Gjatë kontrollit të ushtruar nga efektivët, këtij shtetasi iu gjet dhe iu sekuestrua në cilësinë e provës materiale një armë zjarri pistoletë dhe municion luftarak.
Gjithashtu, Forcat e Posaçme “Shqiponja” në Lezhë kishte siguruar informacione për shtetas që shpërndanin lëndë narkotike në doza të vogla, në Shëngjin, Lezhë.
Pas lokalizimit dhe ndalimit, shërbimet e Policisë, gjatë kontrollit të ushtruar në çantën e këtyre shtetasve gjetën dhe sekuestruan në cilësinë e provave materiale doza me lëndë narkotike të dyshuar cannabis sativa dhe një sasi lekësh të dyshuar të përftuar nga ky aktivitet kriminal.
Në vijim të veprimeve u arrestua Fatmir Ndreca, 17 vjeç dhe Leonard Tuci 17 vjeç, banues në Rrilë, Lezhë, për veprën penale “Prodhimi dhe shitja e narkotikëve”.
