Një virus i zbuluar së fundmi në një lakuriq nate rus i ngjashëm me SARS-CoV-2, ka aftësi të infektojë njerëzit dhe është rezistent ndaj vaksinave aktuale.
Një ekip i udhëhequr nga studiues në Shkollën e Shëndetit Global të Universitetit Shtetëror të Uashingtonit Paul G. Allen zbuloi se proteinat nga virusi i lakuriqëve të natës, i quajtur Khosta-2, mund të infektojnë qelizat njerëzore dhe janë rezistente ndaj antitrupave monoklonale dhe serumit të individëve të vaksinuar për SARS- CoV-2.
Të dy viruset Khosta-2 dhe SARS-CoV-2 i përkasin të njëjtës nën-kategori të koronaviruseve të njohur si sarbecoviruse.
“Hulumtimi ynë tregon më tej se sarbekoviruset që qarkullojnë në kafshët e egra jashtë Azisë madje edhe në vende si Rusia perëndimore ku u gjet virusi Khosta-2 – gjithashtu paraqesin një kërcënim për shëndetin global dhe fushatat e vazhdueshme të vaksinave kundër SARS-CoV-2,” tha virologu Michael Letko.
Letko tha se zbulimi i Khosta-2 thekson nevojën për të zhvilluar vaksina universale për t’u mbrojtur kundër sarbekoviruseve në përgjithësi, dhe jo vetëm kundër varianteve të njohura të SARS-CoV-2.
“Tani për tani, ka grupe që përpiqen të krijojnë një vaksinë që jo vetëm mbron kundër variantit tjetër të SARS-2, por në fakt na mbron nga sarbekoviruset në përgjithësi. Fatkeqësisht, shumë nga vaksinat tona aktuale janë krijuar për viruse specifike që ne e dimë se infektojnë qelizat njerëzore ose ato që duket se paraqesin rrezikun më të madh për të na infektuar. Por kjo është një listë që po ndryshon vazhdimisht. Ne duhet të krijojmë vaksina për të na mbrojtur kundër të gjithë sarbekoviruseve.”- Michael Letko.
Ndërsa qindra sarbekovirusë janë zbuluar vitet e fundit, kryesisht te lakuriqët e natës në Azi, shumica nuk janë në gjendje të infektojnë qelizat njerëzore. Viruset Khosta-1 dhe Khosta-2 u zbuluan te lakuriqët rusë në fund të vitit 2020, dhe fillimisht u duk se ata nuk ishin një kërcënim për njerëzit.
“Genetikisht, këta viruse të çuditshëm rusë dukeshin si disa nga të tjerët që ishin zbuluar diku tjetër nëpër botë, por për shkak se nuk dukeshin si SARS-CoV-2, askush nuk mendoi se ishin vërtet diçka për t’u shqetësuar. Por më vonë zbuluam se mund të infektonin qelizat njerëzore. Kjo ndryshon paksa të kuptuarit tonë për këto viruse, nga vijnë dhe cilat rajone kanë të bëjnë”, tha Letko.
Letko u bashkua me disa anëtarë të fakultetit të WSU, për të studiuar dy viruset e sapo zbuluara. Ata përcaktuan se Khosta-1 përbënte rrezik të ulët për njerëzit, por Khosta-2 demonstroi disa tipare shqetësuese.
Ekipi studiues zbuloi se njësoj si SARS-CoV-2, Khosta-2 mund të përdorë proteinën e saj të spikut për të infektuar qelizat duke u bashkuar me një proteinë receptori, të quajtur enzima konvertuese e angiotenzinës 2 (ACE2), që gjendet nëpër qelizat njerëzore.
Më pas ata vendosën të përcaktojnë nëse vaksinat aktuale mbrojnë kundër virusit të ri. Duke përdorur serumin e marrë nga popullatat njerëzore të vaksinuara për COVID-19, ekipi pa që Khosta-2 nuk u neutralizua nga vaksinat aktuale. Ata gjithashtu testuan serumin nga njerëzit që ishin të infektuar me variantin omicron, por edhe antitrupat ishin të paefektshëm.
Letko tha se ekziston rreziku i rikombinimit të Khosta-2 me një virus si SARS-CoV-2.
