Nuk ka zgjatur shumë entuziazmi për marrëveshjen fillestare të paqes mes SHBA dhe Iranit, që çoi në rihapjen e ngushticës së Hormuzit. Komanda ushtarake e Republikës Islamike njoftoi këtë të shtunë se do të mbyllte sërish ngushticën, jetike për transportin global të naftës, pasi SHBA dhe Izraeli kishin shkelur marrëveshjen e armëpushimit.
Një lëvizje e tillë vjen pasi Izraeli ka vijuar bombardimet në jug të Libanit, pavarësisht një marrëveshjeje armëpushimi me Hezbollahun të njoftuar ditën e premte.
Autoritetet iraniane thanë se ngushtica e Hormuzit ishte mbyllur për shkak të asaj që e cilëson si “shkelje të qartë të besimit dhe mosrespektim të angazhimeve” nga ana e SHBA-së ndaj pikës së parë të memorandumit të mirëkuptimit.
Pika e parë në memorandumin e nënshkruar nga presidenti amerikan Donald Trump dhe ai iranian Mesud Pezeshkian, kërkon ndalimin e menjëhershëm të operacioneve ushtarake në të gjitha frontet, përfshirë Libanin.
Në deklaratën e lexuar në televizion, Teherani paralajmëron se nëse agresioni do të vijojë, hapa të tjerë janë planifikuar.
Izraeli ka theksuar se nuk ka ndërmend të tërheqë trupat nga Libani dhe gjatë së shtunës bombardoi pozicione të Hezbollahut, duke shkaktuar dhjetëra viktima.
Ushtria izraelite njoftoi se kishte sulmuar me dronë e raketa, pasi Hezbollah, milici e mbështetur nga Irani, kishte lëshuar mbi 50 raketa dhe predha ndaj forcave izraelite në Libanin jugor.
Zv.presidenti amerikan JD Vance tha në një intervistë për Fox News se nuk kishte prova që Teherani po mbyllte ngushticën e Hormuzit. Ai theksoi se bisedimet me Iranin po shkonin mirë dhe shprehu besimin se armëpushimi do të mbajë.
Vance shtoi më tej se SHBA do t’i jepte një shans negociatave me Iranin dhe konfirmoi se Steve Witkoff dhe Jared Kushner ishin në Zvicër, gati për të zhvilluar bisedime me përfaqësuesit e Teheranit.
