Policia e Elbasanit ka identifikuar dhe shpallur në kërkim vrasësin e Bujar Çelës, vëllait të shumëkërkuarit Talo Çela.
Burime për Abc News, bëjnë me dije se hetuesit kanë arritur të zbardhin ngjarjen nëpërmjet provave shkencore.
Porositësi i vrasjes së Bujar Çelës dyshohet se është Erion Alibej, i arrestuar më 18 shtator, pasi akuzohet si porositësi i dy vrasjeve të ndodhura në qytetin e Elbasanit, atë të Emiljano Ramazanit dhe Regis Runajt. Aktualisht, ndaj Alibejt është dhënë masa e sigurisë arrest me burg.
Bujar Çela u vra mëngjesin e 17 shtatorit në zonën e Bradasheshit, pranë qytetit të Elbasanit, teksa ishte duke pirë kafe në një lokal.
Ndërkohë, Erion Alibej është vëllai i Endrit Alibej, i cili mbeti i vrarë në aksin Elbasan-Metalurgji, teksa u qëllua me breshëri. Të vdekur mbetën daja i tij Arben Dylgjeri dhe Erdal Durunay, shtetas turk, mik i Endritit.
Erion Alibej është me precedent penal dhe në Itali njihej me emrat Erion Dylgjeri dhe Andrea Alibej. Vrasjet dyshohet të jenë kryer për hakmarrje./ Opinion.al
