Aktualitet

Veliaj: Politikanët që flasin për kulla këtu, reklamojnë në “Instagram” kullat e Dubait



Bëhu pjesë e Grupit Zyrtar të Opinion.al
>> KËTU <<
               Publikuar në : 18:50 - 18/01/23 |
Opi Nion

Kryebashkiaku i Tiranës, Erion Veliaj ka folur lidhur me ndërtimet në Tiranë, teksa ka ironizuar dhe deklaratat e opozitës dhe analistëve.

Gjatë një interviste për “Report Tv”, tha se ata që ngrejnë akuza për kullat në Tiranë, reklamojnë në rrjetet sociale kullat e Dubait,

“Së pari, duhet të pranoj që asnjë nga këta kritikët vetë nuk është gati të lërë apartamentin e tij, nga ku lidhet live me ju, dhe të shkojë të jetojë në një shtëpi qerpiçi, per t’ia liruar atë apartament një tironsi që jeton në një shtëpi të vjetër, nga zhvillimi i së cilës do marre 30% të pallatit të ri, që te akomodojë gjithë familjen e tij me 5-6 kurora. Për sa kohë që asnjë nga këta analistët nuk është gati të ndërrohet, unë këtë nuk e pranoj. Shumica e kritikëve janë parti politike. Ju kujtoj, partitë politike që dolën sot në televizor, i kishin të gjitha kronikat e tyre nga Hotel Plaza, nga një kullë. Kështu që, ata i shajnë si hipokritë ndërtimet në Tiranë, sepse edhe për konferencat e tyre, edhe vendin e preferuar nga ku na shajnë, i kanë kullat e Tiranës. Zoti Mazniku ishte përpara ca kohësh në debat dhe provoi me shifra, se Tirana ka një grup shumë të vogël ndërtesash mbi 12 kate; në fakt, kulla nuk ka as 10, ato që quhen kulla të mirëfillta, me mbi 20 e ca kate, dhe në fakt, edhe ato që janë, kryesisht ndihmojnë për të hequr shëmtinë, ose për të larguar vëmendjen nga shëmtitë”,-deklaroi Veliaj.

Kreu i Bashkisë u shpreh se opozita e cila hedh akuza sot, është përgjegjësja kryesore për situatën nëpër lagjet e Tiranës, duke toleruar në vitet 90 shtesat pa leje te pallateve. Veliaj nënvizoi se ishte pikërisht Edi Rama dhe socialistët ata që filluan punën për lirimin e hapësirave publike të zëna.

“Në brendësi të lagjeve, nuk janë kullat ato që shëmtojnë, janë shtesat që janë bërë në kohën e rrumpallës, të cilat këta analistët, sigurisht që nuk i shohin dhe këta politikanë që vetë jetojnë në periferi të Tiranës, vetë jetojnë në këto leje dhe në këto vila, dhe kurrë nuk dhanë një shtëpi për tërmetin, kurrë nuk ofruan një pjatë supë për Vitin e Ri, dhe kurrë nuk dhuruan diçka gjatë kohës së pandemisë për të qenë solidarë. Ditën e parë që unë do shoh një analist, i cili është gati të ikë dhe të ndërtojë në qerpiç, që nuk është monument kulture, por është në atë situatë skandaloze të ndërtimeve me baltë dhe me kashtë, të viteve të varfërisë së Tiranës të sapo shpallur kryeqytet, atëherë do them që kjo qëndron. Por, për sa kohë që janë përditë duke u lidhur live nga shtëpitë e tyre luksoze nëpër kulla dhe konferencat për shtyp i bëjnë nëpër kulla, unë besoj se duhet të pyesësh ata përse janë kaq hipokritë. Përse kur shkojnë në Dubai na çmendin me Instagramin e tyre nëpër kulla, por në Tiranë ne nuk duhet t’i kemi?”, tha kryebashkiaku./ Opinion.al

Pas