Një denoncim I bërë në prokurori nga biznesmeni Venigjar Begaj rikthen vëmendjen tek skandali dhe afera korruptive e Cez. Është ABC news që ka bërë të ditur lajmin, ku biznesmeni ka denoncuar në Prokurori shkatërrimin e biznesit të tij nga ndërprerja e një kontrate me CEZ-in si pasoj e ndërhyrjeve politike. Është fjala për një kallëzim në një dosje prej 120 faqesh, në të cilin thuhet se kompania e denoncuesit Venigjar Begaj me emrin“Certified Solutions Corporation ( CSC shpk) ishte pajisur me liçencë nga Drejtoria e Përgjithshme e Metrologjisë në vitin 2010 për kolaudimin e matësve të energjisë elektrike që i shpërndante CEZ-i në gjithë Shqipërinë. Sipas Begajt, drejtori i Metrologjisë në atë kohë ishte Gledion Rahovica, aktualisht deputet i LSI-së në Berat, i cili i ka dhënë këtë autorizim me kushtin e përfshirjes në biznes me 49 % të aksioneve krushkun e Ministrit Nasip Naço, shtetasin Qirjako Kongoli. Begaj ka pranuar këtë kusht dhe më pas kësaj kompanie, ku ishte krushku i ministrit aksioner, në vitin 2012 i është dhënë një kontratë ekskluzive 3-vjeçare për kolaudimin e matësve të energjisë elektrike për të gjithë Shqipërinë. Një biznes që prodhonte milliona lekë në muaj. Pikërisht për shkak të këtyre milionave, sipas denoncuesit Begaj, në korrik të 2012 atij iu kërkua që krushku i ministrit Naço, në atë kohë ministër i Ekonomisë dhe Energjetikës, të merrte 80 % të aksioneve. Duke qenë se Begaj kishte bërë të gjitha investimet në këtë kompani, nuk pranoi kushtin. Këtu nisi historia e shkatërrimit të biznesit të kompanisë së tij, bën të ditur Abc news.
Me urdhër nga lart kompania CEZ ndërpreu të gjitha pagesat e kolaudimit të sahatëve. Ndërkohë kishte detyrime të mëdha të pashlyera ndaj kompanisë. Duke qenë se kontrata u ndërpre në mënyrë të njëanshme Begaj u detyrua të kërkonte nga Drejtoria e Përgjithshme e Tatimeve shlyerjen detyrimeve tatimore nga CEZ-i. Bëhej fjalë për mbi 250 milionë lekë të reja ose mbi 2.5 milionë dollarë amerikan detyrime ndaj kompanisë së Begajt.
Drejtoria e Tatimeve nis lëvizjen për të mbledhur detyrimet e saj. Koincidencë ose jo, në gusht –shtator të 2013 në detabazën e bizneseve të mëdha në Drejtorinë e Tatimeve, detyrimet e CEZ-it ndaj kompanisë së Venigjar Begajt rezultonin të fshira. Pikërisht një deputet i LSI-së ishte regjistruar nga kamerat duke hyrë fshehtas tek dhoma e serverave të tatimeve. Është deputeti Spartak Braho që me aktin e tij ka provokuar një skandal shumë të madh. Ndërkohë kolegët e Brahos, përfshirë edhe ministrin Nasip Naço kishin urdhëruar ndërprerjen e kontratës që nuk pranoi t’i jap 80 % të aksioneve krushkut të tij dhe futën në lojë kompani të tjera, si “Hite-Tech-Test”, me pronar Piro Xhinarin, kompaninë “3G” të bashkëshortes së Agron Çelës, deputet i LSI-së dhe kompanian “HTT” të beratasit Genci Gjergjani. Këto tre kompani janë akoma në treg, sipas kallëzimit dhe dyshohet se kanë lidhje me eksponentët e LSI-së. Sot biznesni dhe vet kallëzuesit Begaj janë totalisht të shkatërruar megjithëse bordi i Entit Rregullator të Energjisë i ka njohur borxhin që CEZ-i i ka atij. Begajt nuk i është kthyer asnjë lek, ndërkohë që biznesi i kolaudimit të matësve vazhdon të prodhoj miliona lekë. Më poshtë ekstrakti nga QKR-ja i kompanisë “Certified Solutions Corporation ( CSC shpk), ku sic shihet figuron ortak me 49% të aksioneve krushku i Nasip Nacos, Qirjako Kongoli . Ndërkohë në portalin lapsi.al, publikohen edhe të dhënat e subjektit për të cilin flitet në kallëzim.
