Bota

Ukrainë, Poroshenko “debat televiziv” me podiumin bosh të rivalit komedian


               Publikuar në : 22:30 - 14/04/19 |
el ida

Presidenti në detyrë i Ukrainës, Petro Poroshenko u shfaq në debatin e shumëpritur televiziv me rivalin që kërkon t’i marrë postin, përpara mijëra njerëzve të mbledhur në stadiumin kombëtar të Kievit, vetëm se diçka doli jashtë parashikimeve pasi rivali i tij Volodymyr Zelensky, një komedian pa eksperiencë politike, nuk u shfaq.

Dy garuesit për president ranë dakord që të zhvillonin debatin televiziv gjatë javës së kaluar, por pa caktuar një datë fikse se kur do të bëhej diskutimi i ethshëm përpara ukrainasve.

Zelensky kërkoi që debati të zhvillohej të premten e ardhshme, dy ditë përpara se t’u drejtoheshin kutive të votimit në balotazh, ndërsa Poroshenko, i cili e ndjek në sondazhe pasi fitoi vetëm 16% të votave në raundin e parë zgjedhor, duket se ka në duar tashmë mundësinë që të sigurojë më shumë mbështetje falë dështimit të Zelenskyt për t’u paraqitur në “Olympiyskiy Stadium” në përballjen televizive.

Kreu i shtetit në detyrë e shfrytëzoi qëndrimin e tij 45-minutësh në podium për t’iu përgjigjur pyetjeve të gazetarëve dhe për të sulmuar rivalin e tij në mungesë, duke cilësuar fushatën zgjedhore si një film të heshtur, dhe duke akuzuar Zelenskyn si frikacak.

Komediani Zelensky ka injoruar deri më tani rregullat e zakonshme të fushatës, duke mos mbajtur mitingje dhe duke dhënë rrallëherë intervista, duke preferuar në vend të tyre komunikimin përmes rrjeteve sociale./Opinion.al

Pas