Sektori i pasurive të paluajtshme po dominon tashmë edhe investimet e huaja direkte.
Të dhënat e Bankës së Shqipërisë tregojnë se për tremujorin e parë të këtij viti, investimet e huaja në aktivitete të pasurive të paluajtshme arritën vlerën e 59 milionë Eurove, pothuajse dy herë më shumë krahasuar me të njëjtën periudhë të vitit të kaluar.
Ky sektor solli fluksin më të lartë të investimeve të huaja direkte sipas aktivitetit ekonomik për periudhën dhe po konfirmon sërish nivelet e larta që pati shënuar vitin e kaluar.
Rritja e çmimeve në tregun e pasurive të paluajtshme duket se po tërheq jo vetëm investimet vendase, por edhe kapitalet e shtetasve të huaj. Vitin e kaluar, investimet e huaja në sektorin e pasurive të paluajtshme kanë arritur nivelet më të larta historike, të paktën që prej vitit 2014, kur nis seria kohore e Bankës së Shqipërisë për këtë tregues.
Ndërkohë, një sektor tjetër që shënoi rritje të lartë të investimeve të huaja direkte gjatë tremujorit të parë të këtij viti ishte energjetika. Investimet e huaja në këtë sektor arritën vlerën e 48 milionë Eurove, me një rritje më shumë se dy herë krahasuar me të njëjtën periudhë të vitit të kaluar. Energjetika udhëhoqi rritjen e investimeve të huaja direkte në Shqipëri për vite me radhë, kryesisht falë investimit madhor në gazsjellësin TAP, por edhe projekteve të tjera të rëndësishme të investimeve të huaja, sidomos në energjinë hidrike.
Në periudhën 2019-2020 ritmi i këtyre investimeve ra ndjeshëm, për shkak të përfundimit të shumicës së këtyre investimeve madhore. Tremujori i parë i këtij viti ka shënuar një rritje të re. Sfida e ngrohjes globale, por edhe rritja e çmimeve të energjisë kanë rritur interesin rreth energjive të rinovueshme dhe sidomos, në vitet e fundit, rreth energjisë nga burimet diellore.
Industria nxjerërse ishte edhe në tremujoin e parë ndër aktivitetet me flukset më të mëdha të investimeve të huaja direkte, për një shumë totale prej 39 milionë Eurosh, pothuajse në të njëjtin nivel me tremujorin e parë të vitit 2021. Flukset në këtë sektor konsistojnë kryesisht në fitime të riinvestuara të kompanive ekzistuese në aktivitetin e nxjerrjes së naftës bruto. Rritja e fortë e çmimeve të naftës bruto në tregjet ndërkombëtare këtë vit duket se ka nxitur edhe shtimin e investimeve të huaja në nxjerrjen e naftës në Shqipëri.
Rritje shënuan edhe investimet në sektorin industrisë përpunuese, me 35 milionë Euro, 75% më shumë krahasuar me të njëjtën periudhë të një viti më parë.
Shërbimet financiare ngelen në vazhdimësi një sektor me peshë në strukturën e investimeve të huaja direkte, megjithëse në tremujorin e parë të vitit pësuan një rënie krahasuar me vitin e kaluar. Ato arritën në 28 milionë Euro, 24% më pak krahasuar me tremujorin e parë të vitit 2021. Sektori financiar dhe sidomos ai bankar sjell në vazhdimësi flukse të konsiderueshme investimesh, për shkak se rritja e bankave tregtare kërkon shtim gradual të kapitalit aksioner, për të qëndruar në përputhje me kërkesat rregullatore.
Tjetër sektor që shënoi rritje të investimeve të huaja këtë vit ishte ai i tregtisë, me 21 milionë Euro, dy herë më shumë krahasuar me tremujorin e parë të vitit të kaluar.
Në total, për tremujorin e parë 2021, investimet e huaja direkte arritën vlerën e 273 milionë Eurove, në rritje me 16.7% krahasuar me të njëjtën periudhë të një viti më parë./Monitor
