Gjykata e Strasburgut ka pranuar të shqyrtojë padinë e Altina Xhoxhajt, ish-anëtare e Gjykatës Kushtetuese, kundër shkarkimit nga detyra si pasojë e reformës në drejtësi.
Bashkë me njoftimin se gjykata e Strasburgut ka pranuar shqyrtimin e padisë, ajo i ka drejtuar edhe pesë pyetje autoriteteve shqiptare.
Së pari Gjykata Evropiane e të Drejtave të Njeriut kërkon sqarime në lidhje me ligjshmërinë e KPK si gjykatë dhe a është përmbushur kriteri i paanshmërisë në rastin e Xhoxhajt duke qenë se i njëjti subjekt që ka hetuar gjyqtaren ka vendosur më pas edhe shkarkimin e saj.
Së dyti Strasburgu ka pyetur për mënyrën se si KPK ka vlerësuar konceptin e të ardhurave të ligjshme. Ata kërkojnë gjithashtu informacion nëse ish-gjyqtares Xhoxhaj i është garantuar një proces i rregullt gjyqësor dhe nëse është respektuar e drejta e privatësisë.
Një pikë tjetër që GJEDNJ ka kërkuar sqarim është nëse ish-gjyqtares Xhoxhaj nëse i është dhënë mundësia për tu dëgjuar e për të paraqitur prova para autoriteteve të vettingut.
Altina Xhoxhaj ka pretenduar gjithashtu se i janë shkelur të drejtat e garantuara nga Konventa Europiane e të Drejtave të Njeriut me ndalimin e të drejtës për të punuar si avokate pas shkarkimit nga Gjykata Kushtetuese. Kjo është gjithashtu një nga çështjet për të cilat Strasburgu ka kërkuar përgjigje nga autoritetet Shqiptare.
Kujtojmë se Altina Xhoxhaj u shkarkua nga KPK me vendim të datës 6 prill 2018, i cili u la më pas në fuqi edhe nga Komisioni i Posaçëm i Apelimit më 3 maj të vitit që shkoi.
Shkarkimi i saj u arsyetua nga KPK se ajo nuk justifikonte burimin e pasurive ndërsa gjyqtares iu refuzua kërkesa që të merreshin parasysh edhe të ardhurat e bashkëshortit.
Pas prokurores Besa Nikhasani, Altina Xhoxhaj është ish-zyrtarja e dytë e lartë e gjyqësorit shqiptar që ankohet në Strasburg për shkarkimin nga vettingu. /Opinion.al
