Sërish tension në Komisionin Qendror të Zgjedhjeve. Kryetari i KQZ ka braktisur sërish mbledhjen ë kësaj të enjteje, ndërsa theksoi se ky institucion duhet të ndërpresë procedurat e veta për zgjedhjet e 30 qershorit. Sipas tij KQZ nuk mund të gjykojë vendimin e presidentit, Ilir Meta aq më tepër kur dekreti i tij është botuar në Fletoren Zyrtare.
Anëtarët socialistët në KQZ i kujtuan zotit Zguri, fuqinë e votave në këtë institucion dhe kjo e irritoi më tepër situatën duke bërë që ai të braktisë mbledhjen.
Mbledhja e KQZ këtë të enjte u mblodh pasi, Kryetari i Unitetit Kombëtar, Idajet Beqiri, parti pjesëmarrëse në zgjedhjet e 30 qershorit, përmes një kërkese zyrtare, i kërkon këtij institucion të bëjë çregjistrimin e partisë nga zgjedhjet dhe të heqë emrin e saj nga listat për kryebashkiakë dhe këshilltarë.
Idajet Beqiri argumenton në kërkesën dërguar KQZ-së, se zgjedhjet janë anuluar me dekret të presidentit, i cili është botuar në Fletoren Zyrtare dhe ka hyrë në fuqi.
Por me katër vota është rrëzuar kërkesa e Partisë Uniteti Kombëtar për çregjistrimin nga zgjedhjet.
“Komisioni Qendror i Zgjedhjeve në mbledhjen e ditës së sotme shqyrtoi: “Për shqyrtimin e kërkesës, depozituar në KQZ nga Partia Uniteti Kombëtar me objekt ‘Çregjistrim nga procesi zgjedhor, për zgjedhjet për organet e qeverisjes vendore të datës 30 qershor 2019”. KQZ me 4 vota pro vendosi rrëzimin e kërkesës”, thuhet në njoftimin e KQZ-së.
Sipas Kodit Zgjedhor, subjektet zgjedhore dhe kandidatët, pas mbylljes së afatit për regjistrim, nuk mund të çregjistrohen më nga gara. Tani Idajet Beqiri duhet të ankohet në Kolegjin Zgjedhor, atëherë futet në lojë pikërisht kjo trupë gjyqësore. Duke trajtuar kërkesën e ankimuesit, Kolegjit i duhet të trajtojë indirekt edhe dekretin e Presidentit Meta, duke u shprehur kështu për vlefshmërinë e tij apo jo./ Opinion.al
