Kur heq dorë nga një lidhje e gjatë apo martesë, ditët që vijojnë janë të vështira. Edhe nëse nuk ndjenit më dashuri për partnerin apo lidhja juaj ishte toksike, është e vështirë të ndryshosh jetën dhe rutinën që ke ndjekur për vite me rradhë. Një ndarje shoqërohet gjithmonë me konfuzion, pasiguri e trishtim.
Me siguri ky është një nga artikujt e shumtë që po lexoni për të ndihmuar veten, ndër të tjerave për hobi të reja, gjetjen e qetësisë shpirtërore apo ndryshimet që pasojnë.
Të gjesh vetëbesimin për t’ju kthyer takimeve mund të jetë shumë e vështirë. Mbase partnerin me të cilin menduat se do të kaloni jetën e keni njohur kur ishit 20 vjeç, dhe mendimi i parë i juaji mund të jetë: “E kush do dëshironte të dilte me mua tani?” Kini parasysh që kur t’i ktheheni takimeve nuk do të gjeni vetëm zhgënjim, por edhe emocion, qejf dhe gjallëri.
Është normale të ndiheni nervozë, por mos harroni të emocionoheni
Mund të jetë terrorizuese të dalësh në një takim pas 12 vjetësh lidhje. Pyetjet që sillen në kokë janë “A kanë ndryshuar gjërat?”, “Si mund të kenë ndryshuar?”, “A do ta krahasoj me ish-in?”, “A jam gati për një lidhje të re?”
Mundohuni t’i harroni këto dhe të jetoni momentin. Ripërjetimi i fluturave në stomak, i flirteve, njohja e një njeriu të ri duhet të jetë një eksperiencë e bukur për ju edhe nëse nuk jeni më të interesuar për një takim të dytë.
Edhe takimet, si çdo aftësi tjetër kërkojnë praktikë
Sapo keni dalë nga një lidhje e gjatë dhe ju duket vetja i/e “ndryshkur”. Mund të keni të drejtë, por s’keni pse ndiheni keq. Nëse lidhja juaj ka nisur shumë vite më parë, duhet të keni parasysh që sot aplikacionet për takime romantike janë shumë praktike. Sigurisht, mundet gjithmonë të njiheni me dikë të ri ndërkohë që bëni pazare, palestër apo në lokal nga një mik i përbashkët, por provoni njëherë edhe rrjetet sociale dhe aplikacionet e tjera.
Me kohën do të arrini të kuptoni se cilat nga njohjet virtuale ia vlen të kthehet në një takim në jetën reale.
E vendosni ju momentin që do të hapeni për të shkuarën
Nuk ka një formulë e as një kohë të duhur se kur duhet të thoni që ky është takimi juaj i parë pas një lidhje të gjatë, ose divorci. Thuajeni kur ta ndjeni ju. Sidomos nëse jeni të sapodivorcuar, nuk keni pse të kompleksoheni dhe të lini divorcin t’ju definojë.
Mos e merrni personale nëse mashkulli/femra me të cilët dolët zhduket
Mund të shokoheni në fillim e të pyesni veten se çfarë bëtë gabim, pasi takimi juaj i parë e ndoshta edhe i dyti kanë shkuar shumë mirë. Kini parasyh që është pjesë e procesit të takimeve. Mund të keni pasur një bisedë të këndshme me takimin tuaj, por mbase interesat e tij/saj nuk përputhen me të juajat. Kjo s’do të thotë që po bëni diçka gabim. Nuk ndodh gjithmonë, por nëse ndodh, mos e merrni personale.
Mos kini frikë të thyeni rregullat
Ndarjet janë të trishta ndaj shpesh vendosim rregulla për të parandaluar lëndimin. Themi se nuk duhet të jemi të parët që shkruajmë, nuk duhet të hapemi për veten shumë herët, nuk duhet të krijojmë shpresa e iluzione etj. Ajo që po bëni në këtë rast është që po i mohoni mundësinë njerëzve dhe eksperiencave potencialisht të mrekullueshme. Nuk keni si ta dini nëse do të përsëritet historia apo jo. Por nëse nuk rrezikoni, jeni ju ai/ajo që po humbisni. Mos u mbyllni në vetëvete dhe dilni nga zona e rehatisë. Të thyeni rregullat që vetë keni vendosur mund të jetë gjëja më e mirë që do të bëni.
Një tjetër lidhje apo vetëm seks?
Mund të keni dëgjuar ose jo për shprehjen “Timing is a bitch”, që në shqip mund të përshtatet pak a shumë në këtë formë: Përputhshmëria e fazave të jetës tuaj dhe një tjetri nuk vjen gjithmonë ashtu siç do të dëshironit.
Sapo keni dalë nga një lidhje dhe gjëja që mund të jeni duke kërkuar tani janë marrëdhëniet pa angazhime. Konsideroni mundësinë që personi që sapo keni njohur mund të jetë një njeri i mrekullueshëm me të cilin përshtateni jashtëzakonisht. E nëse ky person kërkon një lidhje serioze edhe pse ju sapo keni dalë nga një, mos e mohoni mundësinë. Mbase kur ju të jeni gati për një lidhje serioze nuk do të njihni një person po aq të mrekullueshëm, për të mos përmendur që do ta keni humbur edhe atë. /Përgatiti: Elena Lika
