Bota

Rrëfimi i një gruaje hebreje që jetoi ngjitur me Hitlerin për disa vite


Bëhu pjesë e Grupit Zyrtar të Opinion.al
>> KËTU <<
               Publikuar në : 11:21 - 13/02/20 |
el ida

Alice Frank Stock, ka jetuar për disa vite në të njëjtin bllok apartamentesh me diktatorin nazist, Adolf Hitler në Mynihun e viteve 1920-30.

Familja e saj jetonte në “Prinzregentplatz”, vetëm disa dyer larg nga Hitleri, i cili ishte transferuar aty në vitin 1929, 4 vite para se Partia Naziste të merrte pushtetin.

Stock thotë se Hitlerin e shihte rrallë, kryesisht teksa futej me nxitim në shtëpi, i rrethuar nga roje, nga frika e ndonjë atentati. Asokohe kishte edhe thashetheme për jetën e tij të natës dhe misterin rreth mbesës, Geli Raubal, me të cilën mendohej se Hitleri kishte një marrëdhënie intime.

“Jetonim në një shtëpi të madhe. Ne jetonim në apartamentin me numër 14, ndërsa Hitleri tek apartamenti tjetër, numri 13, ose 15. Dëgjonim shumë thashetheme, pamë edhe një arkivol të dilte prej aty. Një mbesë e tij jetonte aty me të, por asnjëherë nuk u konfirmua që ishte ajo. Për këtë nuk fliste njeri”, kujton 101-vjeçarja.

“Unë kurrë nuk kam folur me të. Një herë shkova në opera, pasi kisha siguruar bileta për në llozhën mbretërore, por një roje më tha se nuk mund të futesha. Më vonë, pashë që aty po qëndronte ai”, rrëfen Stock. “E kam parë shumë rrallë, nuk të linin rojet”.

Stock u lind në Augsburg, para se të transferohej në Mynih në vitin 1918 kur ishte vetëm 3 vjeçe. Për shkak të situatës kundër hebrenjve ajo u largua fillimisht për në Zvicër kur ishte 17 vjeç, e më pas në Angli, ku familja e saj u detyrua të shiste një violinë 200-vjeçare, me vlerë mbi 1000 stërlina, për t’u futur në ishull. Më vonë ajo punoi për BBC dhe Organizatën për Zhvillim dhe Bashkëpunim Ekonomik (OECD).

Ndërkaq apartamenti i Hitlerit, në “Prinzregentplatz”, konsiderohet si vendlindja e Partisë Naziste. Një prej figurave më famëkeqe në histori, jetoi aty deri në vitin 1933, kur u largua për t’u bërë Kancelar i Gjermanisë. Godina është ende në këmbë edhe sot duke shërbyer për qëllime të ndryshme përgjatë viteve./Opinion.al

Pas