Aktualitet

Rezoluta për negociatat/ PPE kërkon futjen e 15 kushteve për Shqipërinë


Bëhu pjesë e Grupit Zyrtar të Opinion.al
>> KËTU <<
               Publikuar në : 17:22 - 15/06/20 |
Al Do

Grupi i Partive Popullore Europiane (PPE) i ka kërkuar Parlamentit Evropian përfshirjen e 15 kushteve që Këshilli Europian i ka vënë Shqipërisë në Mars në rezolutën e hapjes së negociatave.

Rezoluta për çeljen e negociatave me vendet e Ballkanit Perëndimor është hartuar nga eurodeputeti Tonino Picula. Këtë të hënë, PPE është shprehur se kjo rezolutë është e përgjithshme dhe nuk përmban kushtet që Shqipërisë i janë vënë nga Këshilli Europian në Mars të këtij viti.

Për këtë arsye, dy përfaqësues të PPE-së, eurodeputetja Kinga Gal dhe David Lega, raportuesi për Shqipërinë, kanë propozuar amendimin e rezolutës për të shtuar dhe 15 kushtet.

Fjalia që ata kërkojnë të shtojnë në rezolutë është:

“[Parlamenti Europian] thekson 15 kushtet e caktuara nga Këshilli i Bashkimit Europian që Shqipëria duhet të ketë përmbushur përpara thirrjes së Konferencës Ndërqeveritare të parë me shtetet anëtare.”

Rezoluta mbi Ballkanin Perëndimor pritet të miratohet këtë janë në seancën plenare të Parlamentit Europian.

Partia Popullore Europiane është grupimi më i madh politik në Parlamentin Europian me 187 eurodeputetë.

Kujtojmë se në Mars të këtij viti Këshilli Europian ra dakord në parim për çeljen e negociatave me Shqipërinë dhe Maqedoninë e Veriut.

Sa i përket Shqipërisë ata kërkuan zbatimin e 15 kushteve para nisjes në praktikë të procesit të negociatave.

Kushtet janë si më poshtë:

  1. Miratimi i reformës zgjedhore;
  2. Funksionimi i Gjykatës Kushtetuese;
  3. Funksionimi i Gjykatës së Lartë;
  4. Finalizimi i ngritjes se strukturave kundër krimit të organizuar dhe anti-korrupsionit/Funksionimi i SPAK;
  5. Forcimi i luftës kundër korrupsionit dhe krimit të organizuar, në bashkëpunim me vendet anëtare dhe nëpërmjet Plan Veprimit për adresimin e krimit financiar;
  6. Ulja e numrit të azilkërkuesve, ku një nga masat është bashkëpunimi me Hollandën, Francën, Britaninë e Madhe, Gjermaninë, Italinë, Irlandën;
  7. Rishikimi i Ligjit të Medias në linjë me rekomandimet e Komisionit të Venecies;
  8. Vazhdimi i Reformës në Drejtësi;
  9. Track Records-Iniciimi dhe përfundimi i proceseve gjyqësore të shkallës së parë të zyrtarëve të lartë dhe politikanëve;
  10. Progres në reformën e administratës publike;
  11. Zbatimi i reformës zgjedhore ku përfshihen, financimi transparent i partive, administrimi i paanshëm i procesit dhe procesi i rregullt;
  12. Vendimi për ligjshmërinë e zgjedhjeve lokale 2019 që kërkon plotësimin e Gjykatës Kushtetuese;
  13. Miratimi i Akteve nënligjore të Ligjit për Pakicat Kombëtare ku janë disa VKM;
  14. Miratimi i  Ligjit (të amenduar) të Censusit;
  15. Avancimi i procesit të regjistrimit të pronave. /Opinion.al

Pas