Lufta në Ukrainë ka bërë që qeveria shqiptare të marrë vendimin për të mbështetur prodhimin e grurit në vend. Kush kultivon 1 hektarë grurë do të marrë mbështetje 300 mije leke për hektar. Lajmi është bërë i ditur nga ministrja e Bujqësisë Frida Krifca në një deklaratë për mediat pas mbledhjes së qeverisë.
“Bujqësia ka miratuar një vendim të rëndësishëm. Që ka të bëjë me rritjen e masës së skemës kombëtare të financimit për vitin 2022. Kemi miratuar sot një fond prej 1.2 milardë lekë që i shtohen buxhetit të skemës kombëtare, duke e çuar buxhetin nga 3.7 mld lekë në 4.9 mld lekë. Buxheti më i madh ndonjëherë i vënë në dispozicion. Ne e kishim tashmë dhe me 3.7 mld lekë, por e shtymë dhe më tej këtë që ti vijmë në ndihmë dhe në mbështetje të gjithë kërkesës së fermerëve për uljen e kostove të prodhimit. Ka qenë një vit pothuajse i vështirë në përballimin e kostove, gjithsesi fermerët tanë kanë rezistuar. Kemi patur një sezon mjaft të mbarë të prodhimit të grurit, gati historik. Hambarët janë mbushur lot, rreth 225 mijë ton grurë gjithsesi duke parë edhe fenomenin në botë, duke parë edhe ndërprerjen e furnizimit, për të rritur pavarësinë tonë ushqimore në aspektin e prodhimit të grurit, kemi vendosur të fusim një masë të posaçme, ku për fermerët që prodhojnë mbi 1 hektar grurë, do marrin mbështetje 30 mijë lekë për hektar”, deklaron Krifca.
