Deputeti i PD, Agron Gjekmarkaj, në mbledhjen e sotme të Konferencës së Kryetarëve për zgjedhjen e Presidentit të ri, i është drejtuar mazhorancës duke thënë që është fyerje për grupin parlamentar të PS që përjashtuat mundësinë e tyre për t’u zgjedhur.
Gjekmarkaj theksoi se të paktën të zgjedhim një president politik duke nënvizuar se opozita e ka detyrë të jap një emër dinjitoz .
Më tej ai tha se nëse PS është e sinqertë opozita është e gatshme të propozojmë emra konkretë.
“Në optikën time ky është procesi më i çuditshëm i zgjedhjes së presidentit. Unë besoj shumë se Procesi është në kokën e një individi, i cili prej natyrës mendon se mund të argëtohet me shpenzimet e shoqërisë, të opozitës dhe të tjerëve. Po është e drejta e gjithësecilit të bëjë zgjedhjet e veta. A ka të drejtë mazhoranca të propozojë presidentin? Sigurisht që ka, çdo mazhorancë do ta kishte atë të drejtë, e filloj fjalën time nga ajo që z. Balla tha dje para mediave. A ka të drejtë maxhoranca të propozojë Presidentin e Republikës? Sigurisht që ka.
Çdo maxhorancë do ta kishte këtë të drejtë për ta propozuar sepse ka numrat dhe përgjegjësinë. Por kjo maxhorancë ka disa probleme, ka probleme me çështjen e zgjedhjeve, në raportet e DASH dhe OSBE/ODIHR dhe ka probleme me disa mandate, ku një pjesë e vogël, shpresoj të mos jenë shumë ka përfunduar dhe në qeli. Ana tjetër është mbingarkesa që kjo maxhorancë ka në pushtet. Ka totalitetin e institucioneve të vendit.
Shefi i maxhorancës, kryeministri Rama ka folur për një mundësi bashkëpunimi me opozitën për t’u përfshirë të gjithë në një proces. Nuk e kam kuptuar deri ku shkon oferta e kryeministrit për t’u përfshirë opozita në procesin e zgjedhjes së presidentit, sa kryeministri e dëshiron opozitën pjesë të procesit. Nga ana tjetër duke lexuar aktet brenda grupit tuaj parlamentar që janë publike, ai përcaktoi një komision për të krijuar identikitin e Presidentit të Republikës, deputetët bënë propozime me zarfa dhe me e-maile. Në fund iu tha që nuk do jetë nga politika, nga grupi parlamentar i PS-së. Në një farë mënyre kjo është fyerje dhe për grupin parlamentar të PS-së sepse në instancë të fundit unë dua një president politik. Edhe në qoftë se ju merrni përgjegjësinë për ta zgjedhur të vetëm, duke krijuar totalitetin e piramidës të institucioneev në Shqipëri të dominuara nga PS së paku zgjidhni një personalitet politik të PS-së sepse loja me figurina që vijnë nga jashtë për të bërë shashka mediatike nuk i shërbejnë as vendit, as institucioneve dhe nuk i bëjnë nder as institucionit të Kreut të Shtetit. Për sa i përket rolit të opozitës në këtë histori, unë kam pasur qëndrimet e mia brenda opozitës. Opozita ka detyrimin të nxjerrë emra. pavarësisht se qeveria i merr apo jo parasysh. Opozita e ka detyrë të jap një emër dinjitoz. Nëse jeni të sinqertë ne jemi të gatshëm të propozojmë emra konkret në të kundërt na i kurseni ”-tha Gjekmarkaj./Opinion.al
