Dhunimi i një 17-vjeçareje në Fier nga disa adoleshente ka shkaktuar reagime të shumta në opinionin publik. Në lidhje me ngjarjen ka reaguar edhe familja e njërës prej vajzave 15-vjeçare të përfshira, e cila, me lot në sy, i ka kërkuar falje publike 17-vjeçares së dhunuar dhe familjes së saj, duke shprehur keqardhje të thellë për atë që ka ndodhur.
Prindërit e adoleshentes tregojnë se janë informuar fillimisht për ngjarjen përmes mediave dhe më pas janë shoqëruar në polici, ku kanë dhënë deklarimet e tyre përpara autoriteteve.
Sipas tyre, vajza e tyre 15-vjeçare është diagnostikuar rreth tre muaj më parë me probleme të shëndetit mendor dhe që prej asaj kohe kanë kërkuar ndihmë pranë institucioneve për trajtimin e saj. Ata pohojnë se e mitura kishte shfaqur edhe më herët episode agresiviteti, ndërsa kërkesat e tyre për mbështetje dhe trajtim nuk kanë marrë, sipas tyre, përgjigjen e nevojshme.
Për shkak të pamundësive ekonomike për të përballuar një trajtim të specializuar, familja u bën thirrje institucioneve shtetërore të ndërhyjnë dhe të ndihmojnë në kurimin e vajzës, me shpresën se ajo do të marrë kujdesin e nevojshëm mjekësor dhe psikologjik.
Prindërit theksojnë se nuk synojnë të justifikojnë veprimet e së bijës, por kërkojnë që, krahas përgjegjësisë ligjore për ngjarjen, të mos neglizhohet nevoja për trajtimin e problemeve të saj shëndetësore.
