Rajoni

Pompeo letër Kurtit: Prioritete, taksa dhe njohja e ndërsjellë me Serbinë


               Publikuar në : 11:02 - 13/02/20 |
el ida

Sekretari amerikan i Shtetit, Mike Pompeo i ka dërguar një letër kryeministrit të ri të Kosovës, Albin Kurti, ku e ka uruar për formimin e qeverisë së re, duke thënë se Departamenti Amerikan i Shtetit do të punojë së bashku me të për të përparuar në qëllimet e përbashkëta siç janë, rritja ekonomike dhe sundimi i ligjit.

Pompeo shkruan po ashtu se shpreson që prioritetet kryesore të Kurtit të jenë heqja e tarifës 100 për qind në importet e Serbisë dhe Bosnje-Hercegovinës, dhe njohja e ndërsjellë me Serbinë.

“Heqja e tarifave në mallrat e Serbisë dhe Bosnje-Hercegovinës do të jetë e rëndësishme për kthimin e palëve në tavolinën negociuese. Ne shpresojmë dhe presim që ju do ta bëni këtë gjë prioritet dhe do të përfitoni nga momenti i krijuar pas dy letrave të qëllimit për të krijuar lidhje ajrore dhe hekurudhore në mes të Prishtinës dhe Beogradit”, ka thënë Pompeo në letër.

Pompeo u është referuar dokumenteve të nënshkruara nga zyrtarë të Kosovës dhe Serbisë, në Berlin, me ndërmjetësim të të dërguarit të Shtëpisë së Bardhë për dialogun mes Prishtinës dhe Beogradit, ambasadorit amerikan në Berlin, Richard Grenell.

Sa i përket njohjes së ndërsjellë mes Kosovës dhe Serbisë, Pompeo ka thënë:

“Tani është koha që të realizoni marrëdhënie normale me Serbinë, që kanë në qendër njohjen e ndërsjellë, e cila është thelbësore për integrimin e plotë ndërkombëtar të Kosovës. Shtetet e Bashkuara do të qëndrojnë afër jush për t’iu mbështetur në këtë proces”.

Më herët, kryeministri i Kosovës, Albin Kurti ka thënë se taksën 100 për qind ndaj mallrave serbe synon ta zëvendësojë me masë të reciprocitetit./Opinion.al

Pas