Të martën në emisionin u trajtua tema “SPAK, lidhjet e deputetit të PS-së me bandat!”
Më 20 tetor, një deputet i Partisë Socialiste, Jurgis Çyrbja i cili është denoncuar edhe më parë nga Partia Demokratike u arrestua pasi kishte lënë mandatin vetëm pak ditë më parë pas një thirrjeje në SPAK. U tha se ai ishte arrestuar në kushtet e flagrancës, por ndodhej në lokalin e tij e megjithatë tronditës është fakti që për të ka një sërë gjetjesh që kanë dalë nga zbërthimi i Sky ECC ose EncroChat, dy prej platformave sekrete që po krijojnë një panoramë të plotë të botës së krimit në Shqipëri. Çfarë po ndodh me deputetin e PS? Cili është roli i tij? Cila është e shkuara e tij?
Të ftuar : Klodiana Lala, Artan Hoxha, Gerta Zajmi, Arber Hitaj, Ferdinand Dervishi
Në pjesën tjetër të emisionit u trajtua çështja e kapjes së një sasie botoksi që u konsiderua kontrabandë, ishte një moskuptim nëse ishte e tillë apo e një cilësie jo të duhur. Nga sqarimi i rrethanave doli që botoksi është i ndaluar në Shqipëri. Ndërkohë, prej 10-15 vitesh është aq i pranishëm sa gjendet thuajse në çdo parukeri si dhe qendra estetike. Cilat janë rreziqet? Pse është i ndaluar në Shqipëri? Si duhet bërë dhe cilat janë pasojat? Sekretarja e Përgjitshme e Urdhrit të Shoqatës së Dermatologëve të Shqipërisë, Entela Shkodrani sqaron situatën për “Opinion”.
