Është mbledhur këtë të premte Këshilli për Rregulloren, Mandatet dhe Imunitetin, për të vazhduar diskutimet në lidhje me mandatin e deputetit socialist, Vullnet Sinaj.
Këshilli i Rregullores dhe Mandateve vendosi që kjo çështje të kalojë në seancën e parë parlamentare që do të mblidhet dhe më pas ti kalohet Gjykatës Kushtetuese.
Edhe kryetari i grupit parlamentar të PD, Gazment Bardhi kërkoi të njëjtën gjë, duke i thënë mazhorancës që mos vonohen me procedurat.
Ai i ka kujtuar rastin e mandatit të Olta Xhaçkës, që sipas tij është e paprecedentë në 34 vite, ku nuk zbatohen dy vendime të Gjykatës Kushtetuese dhe një opinioni i Komisionit të Venecias.
“Kërkojmë që mocioni të përfshihet në rendin e ditës së seancës më të parë plenare dhe dërgimin në GJK për konstatimin e papajtueshmërisë dhe mbarimit të mandatit të deputetit Vullnet Sina. Kërkoj që kjo çështje të votohet në seancën e ditë së hënë, edhe pse është seancë inaugurimi, sepse ju e dini që ka një afat në GJK që duhet të shqyrtohen kërkesa të tilla.
E keni një eksperiencë të keqe të paparecedent për një kolegen tuaj që vazhdoni ta mbroni dhe të duke shkelur dy vendime të GJK dhe një opinion të Komisionit të Venecias. Mos u bëni përsëritës në shkeljen e kushtetutës”, tha Bardhi.
Nga ana tjetër edhe deputetja e PS, Klotilda Bushka u shpreh pro çuarjes ne seance projektvendimi për dërgimin e mocionit në Gjykatën Kushtetuese.
“Në këto kushte shumica në këtë këshill rekomandon që t’i kalojë në seancë plenare për votim projektvendimi për dërgimin e mocionit në Gjykatën Kushtetuese për konstatimin e papajtueshmërisë të mbarimit të mandatit të deputetit Vullnet Sinaj”, u shpreh Bushka.
