Britania, Franca, Gjermania dhe Japonia janë përpjekur të bindin udhëheqësit e Shteteve të Bashkuara dhe Iranit për tu takuar teksa ata morën pjesë në Asamblenë e Përgjithshme të Kombeve të Bashkuara në Nju Jork.
Presidenti francez, Emmanuel Macron, tha se do të ishte “një mundësi e humbur” nëse presidenti iranian, Hassan Rohani, do të largohej nga Shtetet e Bashkuara, pa u takuar me Trumpin. Deklarata e tij u mbështet nga kryeministri britanik, ndërkaq drejtuesit e Gjermanisë dhe Japonisë zhvilluan takime me Rohanin dhe Trumpin, duke u kërkuar atyre të takohen.
Gjithashtu, kryeministri pakistanez, Imran Khan, tha se Shtetet e Bashkuara dhe Arabia Saudite i kërkuan atij të ndërmjetësonte me Iranin, për të qetësuar tensionet.
Marrëdhëniet ndërmjet SHBA-së dhe Iranit janë tensionuar që nga viti i kaluar kur presidenti i SHBA-së, Donald Trump, u tërhoq nga një marrëveshje bërthamore me Teheranin, dhe vendosi sërish sanksione në industrinë e saj të naftës dhe në fushën e financave.
Marrëveshja bërthamore e vitit 2015 që përfshin gjithashtu Britaninë, Francën, Gjermaninë, Rusinë dhe Kinën, kishte për qëllim të frenonte programin bërthamor të Iranit ndërsa hiqte sanksionet ndaj këtij vendi./Opinion.al
