Që në nisje pati tension. Opozita parlamentare nuk u “ndje” mirë, me përfaqësuesit e opozitës jashtë parlamentit. Fillimisht protagonist u bë deputeti Kujtim Gjuzi. Ai nuk pranoi që eksperti i PD-së, Ivi Kaso të flasë përpara Rudina Hajdarit.
Debati mes Damian Gjiknurit dhe Kujtim Gjuzit
Kujtim Gjuzi: Zoti Gjiknuri të lutem, duhet të flasë Rudina Hajdari para Ivit Kasos
Damian Gjiknuri: Axhenda është dakordësuar, nuk mund të bëni avokatin e saj, zoti Gjuzi
Kujtim Gjuzi: Ivi Kaso nuk mund të flasë para Rudina Hajdarit, nuk na e mbyll dot gojën
Damian Gjiknuri: Rri si njeri aty….mos bën avokatin e saj. Unë e kuptoj se nuk janë normale këto, por e kuptoj emocionet….
Adriatik Alimadhi: I bëj thirrje Hajdarit dhe Murrizit që të ikim nga kjo tryezë
Pas fjalës së ekspertit të PD-së, ishte sërish Kujtim Gjuzi që pati debat me bashkëkryetarin e PS-së, në komisionin e reformës zgjedhore.
Debati i dytë mes Damian Gjiknurit dhe Kujtim Gjuzit
Kujtim Gjuzi: Kërkoj fjalën…
Damian Gjiknuri: Është kollaj të prishësh një tavolinë, po japim shembullin më keq. A doni që kjo tavolinë të jetë produktive, por është turp o njerëz. Ky nuk është komision i reformës. Është një konferencë, kemi ftuar ekspertë. Në fund të axhendës kemi tre seksione, për partitë që janë apo jo parlamente.
Duke i komunikuar diçka në vesh ambasadorit të OSBE, në këtë trryezë ekspertët e opozitës jo parlamentare u larguar. Edhe ky veprim solli sërish tensione dhe debat.
Damian Gjiknuri: Kjo tavolinë është e lirë, Shqipëria është pjesë e njerëzve të lirë që do të thotë se kushdo që vjen mund të mbajë qëndrimin e tij.
Rudina Hajdari: Mirë që ikën, c’i do këtu…
Deputeti Adriatik Alimadhi i kërkoi Rudina Hajdarit si bashkë-kryetare e reformës zgjedhore që të largohet nga tryeza dhe që votat e 39 deputetëve të opozitës në Kuvend të kushtëzohen me kodin e ri zgjedhor. “Ju kërkoj të tërhiqemi nga ky takim dhe 39 deputetët të kushtëzojnë të gjitha lëvizjet derisa të marrë prioritet ndryshimi në kodin zgjedhor” tha ai.
Por Rudina Hajdari u shpreh se nëse do të largohen do të sillen si PD-ja, ndërsa shtoi se kjo është anija e fundit e tyre dhe nëse do të bojkotojnë sërish do të fundosen.
“Nëse ikim po sillemi si ata. Kjo është anija e fundit, nëse ata do të ikim ju siguroj që do të fundosen në fundin e historisë”, tha ajo.
Teksa zhurma dhe kaosi pushtoi këtë konferencë, opozita ere u largua nga salla, me pretendimin se nuk mund të ishin fasadë e një fejese PD-PS. Ambasadori i OSBE-së, ndërhyri duke kërkuar qetësi në sallë pas debateve mes deputetëve të opozitës së re me Gjiknurin.
“Zonja dhe zotërinj vëmendje ju lutem, respektoj miqtë dhe mikpritësit, është diskutim i vështirë ky që po bëjmë, Ti qëndrojmë axhendës, më vonë gjatë kafes mund t’ua shpjegoj, por tani duhet të vijojmë” tha ai.
Më i ashpër në një deklaratë për mediat ishte deputeti Ralf Gjoni i cili tha se që në nisje kjo tryezë ishte një maskardë dhe u bë për të arritur një marrëveshje të fshehtë mes PD-së dhe PS-së./ Opinion.al
