Prej dy vitesh, Partia Demokratike ka akuzuar mazhorancën për përfshirjen e personave me të shkuar kriminale në postet publike të vendit. Pikërisht për këtë arsye u krijua edhe ligji i ‘dekriminalizimit’ i cili vendos kushte të forta për ata që duan të kandidojnë për deputetë ose kryetarë bashkishë.
Megjithatë, pas zgjedhjeve lokale të 30 qershorit u zbulua përmes denoncimeve të PD se disa kryebashkiakë të PS kanë qenë të dënuar në vendet fqinje, kujtojmë këtu Valdrin Pjetrin në Shkodër dhe Agim Kajmakun në Vorë.
Denoncimet ndaj kryebashkiakëve socialistë kanë ardhur në rritje, ndërsa PD pretendon se përveç 5 atyre që ka bërë publike deri tani është duke hetuar edhe 15 të tjerë.
Por cilët janë kryebashkiakët të cilët PD po i heton për një të shkuar problematike me drejtësinë?
Në një video të publikuar nga Sekretari i Përgjithshëm i PD, Gazment Bardhi bie në sy se në fund të saj shfaqet një hartë e Shqipërisë ku përpos emrave të kryebashkiakëve të akuzuar tashmë, shenjohen edhe disa bashki të tjera. Mesazhi i në krye të videos është “Kush e ka radhën” çka lë të kuptohet se këto janë edhe kryetarët e bashkive që PD po heton për të shkuar problematike.
Bashkitë e të shënuara janë: Tropoja, Puka, Kukësi, Dibra, Tirana, Elbasani, Fieri, Skrapari, Korça, Vlora, Gjirokastra dhe Saranda.
Deklarimet e pavërteta në formularin e dekriminalizimit kanë rezultuar deri tani fatale për karrierën politike të Valdrin Pjetrit dhe Agim Kajmakut. Ndërkohë janë ende nën verifikim nga prokuroria, Mark Babani i Vaut të Dejës, Qerim Ismailaj i Mallakastrës dhe Agron Malaj i Matit.
Ditën e enjte në emisionin Opinion, drejtuesi i emisionit Blendi Fevziu lexoi një mesazh ku denoncohej një tjetër kryebashkiak që pretendohej se në vitin 1996 është ndaluar nga policia për kontrabandë.
Lexo edhe: Bie një tjetër kryebashkiak? Mesazhi që u lexua live në emisionin Opinion
Në video-mesazhin e tij në Facebook, Gazment Bardhi bën përgjegjës drejtpërdrejtë kryeministrin Rama për futjen e këtyre personave si kandidatura në pozicione publike dhe citon këtë të fundit në një emision televiziv kur thotë se është duke pritur të shohë se kush janë kriminelët e shumëpërfolur. /Opinion.al
