Deputeti i Partisë Demokratike, Luan Baçi në një deklaratë për mediat ditën e sotme i është drejtuar sërish SPAK me 5 pyetje për aferën e inceneratorëve.
E teksa i drejtohet Prokurorisë së Posaçme si çdo ditë, PD përmes deputetit Baçi, denoncon faktin se Ministria e Medisit ka firmosur një kontratë me vlerë 30 milion euro për pronarët në kërkim të inceneratorit të Fierit pa VKM dhe pa u botuar në Fletoren Zyrtare.
Deklarata e plotë
Një kontratë koncensionare është lidhur mes ministrisë së Mjedisit dhe kompanisë Integrated “Technology Waste Management” që në tetor 2016. Vlera e kontratës është 30 milion euro.
Partia Demokratike, opozita dhe aktorë të ndryshëm të shoqërisë civile e kanë denoncuar pa ndërprerje atë koncension që u kthye në mega-aferë. Thuajse 6 vjet më vonë ende ka shumë pyetje, por asnjë dilemë. Pronarët e inceneratorëve janë në kërkim, ndërkohë që produktet e veprës penale nuk bllokohen.
Përgjigjet duhen kërkuar te mëkati apo korrupsioni fillestar. Që në firmosjen e kontratës mes ministrisë së Mjedisit dhe kompanisë së Klodian Zotos ka shumë gjëra që “mbajnë erë”. Kompanitë e djegies së mbetjeve, që u krijuan për ta zhdukur erën e keqe nga qytetet, bënë të kundërtën, e shtuan atë. Duke shtuar, bashkë me erën, edhe kostot të cilat llogariten në kufijtë e 500 milion eurove.
Sot, si çdo ditë, kemi këto pyetje të thjeshta për SPAK:
- Pse nuk ka një VKM për 30 milionë eurot e inceneratorit të Fierit, apo ka nje te tille dhe mbahet i fshehur?
- Pse kjo kontratë 30 milion euroshe nuk është botuar fare në Fletoren Zyrtare?
- Kush kishte tagrin që të injoronte vendimin e Fierit dhe ta ndërtonte krejt tjetërkund nga 10 vendosjet e vlerësuara nga Bashkia e Fierit?
- Para 3 vitesh KLSh njoftoi se ishin marrë 88% te fondit për inceneratorin e Fierit por nuk ishin investuar as 12%! Ku shkuan ato para?
- Pse nuk ndërpritet kontrata dhe të dërgohet për ndjekje penale?
Këto janë pyetjet dhe secili i formulon vetë përgjigjet. Por, deveja nuk futet në thes. Thesi nuk bëhet dot llogari në offshore dhe, sado të vonojë koha, një ditë vjedhësit që e varin xhaketën te firma e Edi Ramës dhe sejmenëve të tij do të japin llogari.
