Deputeti socialist, Spartak Braho ka komentuar sot në mbledhjen e komisionit të sigurisë akuzat e Presidentit Meta për grusht shteti.
“Çuditem me një gjë, nuk e kuptoj alarmin e opozitës dhe kreut të shtetit se po bën grusht shteti Edi Rama. Si mund të bej grusht shteti Edi Rama kundër vetes së tij? Opozita mund të bëjë grusht shteti. Është jo vetëm qesharake por një lloj justifikimi. Jam deputet i vjetër dhe ka pas raste kur Sali Berisha ka tentuar grusht shteti. Si mund të bëjë mazhoranca grusht shteti kur pushtetin e ka.” u shpreh Braho.
Në mbledhjen e komisionit po diskutohet akti normativ i qeverisë për paketën Anti-KÇK. Braho justifikoi masat e jashtëzakonshme të parashikuara duke marrë si shembul Italinë dhe SHBA-në.
“Nuk jemi ne të parët që aplikojmë masa të jashtëzakonshme kundër kriminalitetit. Italia në vitet ’80, i ka aplikuar ato. SHBA pas 11 shtatorit aplikoi masa të forta që preknin të drjetat e njeriut. Edhe ne kemi zgjedhur këtë masë.” tha ai.
Megjithatë, Braho i kërkoi zëvendësministres Voda që të bëhet kujdes me aplikimin e këtij akti duke zbuluar se për këtë kishte biseduar edhe me ministrin Lleshaj.
“Zonja zv ministre kam një merak, bëni kujdes për modealitetiet dhe procedurat e aplikimit të aktit duhet të jenë serioze e të goditura dhe të studiuara, kam biseduar për ministrin tuaj për një rast që ishte flagrant, kjo ishte porosia ime”, tha Braho. /Opinion.al
