Gjykata Kushtetuese deklaratë: Ditë e shënuar, ringritja kërkesë jetike

Kanë reaguar 6 anëtarët e Gjykatës Kushtetuese pas arritjes së kuorumit të domosdoshëm për ta bërë këtë gjykatë funskionale.

Ata e cilësojnë të sotmen si një ditë të shënuar e realizim të një kërkese jetike për shkak të rolit dhe kompetencave që ka kjo gjykatë.

Nëpërmjet një deklarate në faqen zyrtare të Gjykatës Kushtetuese ata shprehin angazhimin se do të ushtrojnë funksionet me integritet dhe qëndrueshmëri për përmbushjen e misionit kushtetues.

“Sot është një ditë e shënuar për Gjykatën Kushtetuese të Shqipërisë. Me emërimin e dy anëtarëve të rinj të saj krijohet kuorumi i nevojshëm ligjor për rinisjen e funksionalitetit dhe veprimtarisë vendimmarrëse që pas ndërprerjes në mars të vitit 2018.

Ringritja e Gjykatës Kushtetuese ka qenë një kërkesë jetike për vendin, për shkak të rolit dhe kompetencave që ajo ka si garante e Kushtetutës dhe shtetit të së drejtës, në mbrojtje të demokracisë, lirive dhe të drejtave themelore të individit. Ky proces ka qenë i gjatë e kompleks dhe ka kërkuar bashkëpunimin e shumë institucioneve shtetërore dhe më gjerë. Gjithashtu një mirënjohje e veçantë shkon edhe për mbështetjen e pakursyer të dhënë nga partnerët ndërkombëtarë për përmbylljen me sukses të këtij procesi.

Gjykata Kushtetuese është e angazhuar të ushtrojë funksionet me integritet dhe qëndrueshmëri për përmbushjen e misionit të saj kushtetues, duke pasur besimin e plotë të kapërcimit të sfidave që janë përpara saj, në respektim të vlerave dhe standardeve me të rëndësishme kushtetuese”, thuhet në deklaratën e anëtarëve të Gjykatës Kushtetuese.

Kujtojmë që pas 3 vitesh kjo gjykatë është bërë funksionale. Ditën e sotme u betua anëtari i 6-të i saj Përparim Kalo, i zgjedhur nga vakanca e Presidentit, ndërsa pak ditë më parë u zgjodh Altin Binaj nga Parlamenti.

Tashmë të emëruar janë 6 anëtarë, nga 9 që duhet të ketë, por të mjaftueshëm për të nisur punën.

Antarët: