Aktualitet

Gara për kreun e BKH/Nis sot testi i kandidatëve në makinën e së vërtetës


               Publikuar në : 11:36 - 18/02/20 |
Al Do

Kandidatët për drejtimin e Byrosë Kombëtare të Hetimit do t’i nënshtrohen testimit të makinës të së vërtetës (poligrafit) duke nisur nga dita e sotme.

Pas testimit me shkrim dhe atij fizik, 8 kandidatët e mbetur do të kalojnë dy nga dy në testin e poligrafit në seanca që do të zgjasin nga 2 deri në 4 orë. Marrja e tyre në pyetje do të nisë ditën e sotme dhe do të përfundojë të premten, pranë SHÇBA-së tek ministria e Brendshme.

Pas marrjes së rezultateve, SPAK do të përzgjedhë një nga 8 kandidatët, emrin e të cilit do t’ja përcjellë KLP-së për ta zgjedhur në krye të BKH-së.

Testimi i poligrafit, quajtur ndryshe makina e së vërtetës, bazohet mbi faktin se gënjeshtra provokon emocione të cilat modifikojnë parametrat fiziologjike, si presioni i gjakut, frekuenca kardiake, ritmi i frymëmarrjes e deri tek rezistenca e ndryshuar e lëkurës ndaj përcjelljes se rrymës elektrike. Makineritë të cilat iu dhuruan Ministrisë së Brendshme nga SHBA, janë në gjendje që të gjitha këto parametra t’i përmbledhin në një raport grafik. Kjo metodë përdoret nga FBI-ja gjatë marrjes në staf të punonjësve të rinj.

Kandidatët që janë ende në garë për kreun e BKH-së janë: Aida Veizaj (Hanaj), Ervin Hodaj, Ylli Pjetërnikaj, Gentjan Shehaj

Ardian Çipa, Idajet Faskaj, Lindita Nushi dhe Artur Beu.

Byroja Kombëtare e Hetimit konsiderohet ndryshe “dora e hekurt’’ e Prokurorisë Speciale Antikorrupsion. Ajo do të nga hetues të cilët kanë marrë eksperiencë për praktikat më të mira perëndimore dhe gjithashtu janë trajnuar me pajisjet më modern nga FBI. Puna e tyre është të ndihmojnë hetimin e çështjeve të prokurorëve të SPAK. Me ngritjen e saj përfundon edhe ngritja e SPAK pasi më parë janë ngritur Gjykata e Posaçme për Korrupsionin dhe Krimin e Organizuar dhe Prokurorisë Speciale Antikorrupsion. /Opinion.al

Pas