Kryeministri i Kanadasë Justin Trudeau, është shprehur se Rusia mund të ndërhyjë në zgjedhjet që do të zhvillohen më 21 tetor.
“Kemi parë gjatë viteve të kaluara një rritje të ndikimit të faktorëve të jashtëm në proceset demokratike, dhe kemi parë po kështu se prapa fushatave përçarëse kanë qëndruar shtete si Rusia”, deklaroi ai.
Ai shtoi gjatë fjalës së tij, se Kanadaja ka nisur të marrë masat enevojshme për të shmangur elemnetët e jashtëm që kërkojnë të ndërhyjnë në zgjedhje.
Karina Gould, ministre e Institucioneve Demokratike, është angazhuar me mënyra të ndryshme në mbrojtjen e zgjedhjeve dhe garantimin që vota do të vendoset nga kanadezët. Një prej tyre është krijimi i një grupi prej 5 nëpunësish të lartë publike, të cilët do të verifikojnë me kujdes për akte dashakeqe gjatë fushatës dhe zgjedhjeve federale.
“Mendoj se ajo që ne po shohim është diçka që po ndodh në shumë demokraci liberale; përpjekja nuk është patjetër të sigurohet një rezultat i caktuar nga zgjedhjet; është t’i bëjë shoqëritë tona më të polarizuara dhe ne, si qytetarë të demokracisë, të na bëjë më cinikë për demokracinë në vetvete, e kjo, edhe mund të funksionojë”-tha Chrystia Freeland, ministre e Jashtme e Kanadasë.
Kujtojmë që Rusia është akuzuar vazhdimisht nga agjencitë e inteligjencës në SHBA dhe BE për ndërhyrje në zgjedhjet presidenciale të vitit 2016 në Shtetet e Bashkuara.
Nga ana tjetër, Rusia ka mohuar që të ketë ndërhyrë në zgjedhjet në SHBA, duke i cilësuar ato si mashtrime që cënojnë stabilitetin botëror./ Opinion.al E.Xh.
