Një 47-vjeçar është arrestuar pasi dyshohet se është autori i zjarrit të rënë në vendin e quajtur Sasat, në malin e Gjallicës.
Policia bën me dije se është vënë në pranga Ekrem Onuzini, të cilit gjatë kontrollit iu gjet edhe një armë zjarri kallashnikov dhe municion luftarak.
“Strukturat e Komisariatit të Policisë Kukës, në vijim të veprimeve për identifikimin dhe vënien para përgjegjësisë ligjore të autorëve të zjarrëvënies të qëllimshme apo nga pakujdesia, bënë të mundur identifikimin dhe arrestimin në flagrancë të Ekrem Onuzinit, 47 vjeç, banues në fshatin Nang, si autor i dyshuar i zjarrit në vendin e quajtur Sasat, në malin e Gjallicës.
Gjithashtu, gjatë kontrollit të ushtruar, Policia i gjeti dhe sekuestroi një armë zjarri kallashnikov dhe municion luftarak.
Materialet i kaluan Prokurorisë së Rrethit Gjyqësor Kukës, për veprat penale “Mbajtja pa leje e armëve dhe municionit luftarak” dhe “Shkatërrimi i pronës me zjarr”.
Drejtoria Vendore e Policisë e Policisë Kukës apelon për të gjithë banorët, që në asnjë rast mos shkaktojnë zjarrvënie pasi do përballen me ligjin. Policia fton qytetarët që të denoncojnë në numrin 112 dhe Komisariatin Dixhital për çdo rast të zjarrvënies apo të paligjshmërisë në tërësi duke ju garantuar anonimatin dhe reagim të shpejtë e të paanshëm nga strukturat policore”, njofton policia./Opinion.al
