Katër ditë para datës 30 qershor, Edi Rama nga Elbasani ka ashpërsuar tonet me kundërshtarët politikë.
Ai tha se në Elbasan, Lulzim Basha dhe Monika Kryemadhi nuk kanë kontribuar asnjëherë në të mirën e qytetit. Ai kujtoi edhe njëherë paralajmërimin e diplomatëve amerikanë se nëqoftëse cënohen zgjedhjet PD do të shpallet organizatë e dhunshme.
Por Rama u përqendrua te anëtari i Partisë Demokratike, Aurel Bylykbashi, dhe deklaratat që ai bëri ditët e fundit në lidhje me rezistencën që opozita duhet të bëjë që zgjedhjet të mos zhvillohen në 30 qershor.
Kryeministri anatemoi me një gjuhë shumë të ashpër Bylykbashin.
“Një kokërr injoranti që nuk di se çfarë flet, është mishërimi i veshgjatit. Në atë kohë të cilës ai referohet u vendos asgjësimi i pluralizmit. Sot opozita u vetëvra. Sot është opozita që kërkon të marrë peng pluralizmin, për të marrë peng për Shqipërinë për ta mbajtur larg tryezës së BE. Ai do të bëhet drejtor hipoteke, ç’lidhje ka ai me shekullin e 21. Ç’lidhje ka ai veshgjati që kërkon vëllavrasje sikur ha tavë dheu me Lulin. Ai është një shëmtim për Elbasanin. Ai është një aksident i natyrës. Ai është një gabim njerëzor. Ai është krijuar në një moment kur zoti nuk e ka pas mendjen” tha Rama duke ju referuar Aurel Bylykbashit.
Kryeministri ripërsëriti se Partia Socialiste me gjithë gabimet që mund të ketë bërë mbetet forca më e mirë për tu votuar nga elbasanasit. Ndërsa në lidhje me mbarëvajtjen e procesit zgjedhor ai bëri thirrje se kush do të mundohet të pengojë zgjedhjet s’do të dalë më nga Shqipëria.
“Mos ja zeni venin në burg atij figurës. Ai le ta provojë, por nuk është menia në ven nëqoftëse ju kërkoni të shkoni në burg për ate” tha Rama.
“Për ta mbyllur me një fjalë të mirë për njerëzit e mirë unë dua të them, kemi ardhur me Qazimin ktu, ju kam thënë jepjani votën Qazimit se do të bëjë për Elbasanin më shumë se çdo kush. Tani po ju them që në katër vitet e ardhshme do të bëjmë edhe më shumë” përfundoi Rama fjalimin e tij. /Opinion.al
