Trajneri i Fenerbahce, Jose Mourinho, ka shkaktuar polemika në Turqi, me një deklaratë të bërë në fund të sezonit. Tekniku portugez ishte në qendër të kritikave, pas humbjes 4-2 që Fenerbahce pësoi nga Hatayspor, skuadër që ka rënë nga kategoria.
Për t’iu përgjigjur kritikave, Mourinho ka bërë një deklaratë të fortë, e cila nga shumë në Turqi është marrë si fyese. Ai tha se në shtatë vitet e fundit ka arritur më shumë finale, sesa futbolli turk në të gjithë historinë.
“Në shtatë vitet e fundit, kam luajtur në dy finale. Ky numër është më i madh sesa numri i finaleve që ka futbolli turk në të gjithë historinë e tij.
E ardhmja? Presidenti më beson. Ai e ka bërë të qartë publikisht këtë. Nëse ka ndryshuar diçka, mua nuk më kanë njoftuar”, tha Mourinho.
Fenerbahce e mbylli sezonin në Turqi në vendin e dytë, me titullin kampion që shkoi te Galatasaray.
