Ditën e djeshme iu dha lamtumira e fundit babait të Hashim Thaçit, Haxhi Thaçi. Varrimi u mbajt në Drenicë, por ish-presidentit të Kosovës, i cili mbahet në paraburgim në Hagë, iu ndalua që t’i hidhte një grusht dhé babait të tij.
Gazetari Blendi Fevziu ia dedikoi emisionin e “Opinion” Hashim Thaçit si një lloj homazhi ndaj dhimbjes së tij që nuk mund të ishte i pranishëm në varrim dhe gjithë kontributit të tij në politikë.
Sa i përket ndalimit që i bëri Gjykata Speciale, Fevziu u shpreh se vendimi “është kundër çdo lloj norme zakonore shqiptare, kundër të drejtave të njeriut dhe padyshim kundër çdo lloj parimi të drejtësisë moderne”.
“Sot ish-presidenti i Kosovës, Hashim Thaçi, i cili ndodhet në paraburgim në Hagë dhe që ka humbur babain e tij është ndaluar nga Gjykata Speciale që të marrë pjesë në varrimin e të atit. Varrimi është mbajtur sot pasdite në Drenicë, në prani të familjarëve, të mbështetësve të presidentit, natyrisht njerëzve që e kanë konsideruar këtë akt të Gjykatës Speciale të paprecedentë. Në traditën e shqiptarëve, në zakonet e shqiptarëve në atë që quhet tradita zakonore e jona, gjithmonë, një njeri e ka konsideruar detyrim të hedhë një grusht me dhé mbi arkivolin që po futet në varrezat të të një afërmi apo miku të tij. Është një prej traditave që çdo shqiptar, kushdo që ka shkuar në varrime, e ka parë. Sot Hashim Thaçi është ndaluar që të hedhë një grusht me dhé mbi arkivolin e babait të tij, i cili në një farë mënyrë së bashku me nënën, të dy si prindër, patën jo pak shqetësime, jo pak ankthe, jo pak po e quaj frikë për atë që mund t’i ndodhte djalit të tyre. Hashim Thaçi është një prej personazheve më të rëndësishëm të historisë së Kosovës. Kryetar i delegacionit të Kosovës në Rambuje, firmëtar në Rambuje, kryeministër, president, njeriu që ka lexuar deklaratën e pavarësisë së Kosovës. Ndalimi i tij për të marrë pjesë në varrim është kundër çdo lloj norme zakonore shqiptare, është kundër të drejtave të njeriut dhe është padyshim kundër çdo lloj parimi të drejtësisë moderne”,-tha Fevziu.
