Kryesore

Zgjidhet pasardhësi i Zoran Zaevit, kush do të jetë kryetar i ri i LSDM-së


Bëhu pjesë e Grupit Zyrtar të Opinion.al
>> KËTU <<
               Publikuar në : 08:36 - 13/12/21 |
Opi Nion

Dimitar Kovaçevski, është zgjedhur kryetar i Lidhjes Social Demokrate të Maqedonisë së Veriut. Në këtë post, ai do të zëvendësojë kryetarin e deritanishëm, Zoran Zaev, i cili dha dorëheqjen pas humbjes së LSDM-së në zgjedhjet lokale të 31 tetorit.

Zgjedhja e Kovaçevskit u bë në Kongresin e jashtëzakonshëm të socialdemokratëve, ndërsa me të në garën për kryetar  garuan edhe dy kandidatë të tjerë, Frosina Remenski dhe Jovan Despotovski.

Kryetari i ri i LSDM-së, Kovaçevski, pritet të jetë edhe kryeministër i ardhshëm pasi, Zoran Zaev, dorëheqjen ka paraqitur edhe nga drejtimi i qeverisë, por ende nuk ka kaluar në Kuvend pasi organet drejtuese të LSDM-së, kërkuan shtyrjen e dorëheqjes deri në zgjedhjen e kryetarit të ri dhe sigurimin e shumicës në Kuvend.

“Qytetarët duhet ta rikthejnë besimin tek institucionet dhe e ardhmja e vendit dhe për këtë Qeveria duhet t’i përmbushë pritjet e tyre për efikasitet më të madh në qeverisje dhe përmbushje të premtimeve. Çelësi për këtë është te vendosja e njerëzve të duhur në pozitat e duhura, si dhe krijimi i një sistemi në të cilin secili do të jetë përgjegjës për detyrat e veta. Duhet përqendrim më i madh në nevojat reale të qytetarëve, në ato probleme që rëndojnë mbi njerëzit. Nevojitet gjithashtu një qeverisje e përgjegjshme dhe një luftë e qartë kundër krimit dhe korrupsionit”, tha Kovaçevski.

LSDM-ja, që drejton qeverinë e Maqedonisë së Veriut humbi shumicën pas largimit të lëvizjes Besa nga qeveria. Pjesë e qeverisë tani do të jetë partia Alternativa, e cila në zgjedhjet lokale ishte në koalicion opozitar me Aleancën për Shqiptarët, por edhe nënshkruese e nismës për mocionin e mosbesimit të qeverisë, që ishte iniciuar nga VMRO DPMNE, më 11 nëntor.

Kovaçevski, tashmë kryetar i Lidhjes Social Demokrate të Maqedonisë së Veriut, ka mbajtur më herët postin e zëvendësministrit të Financave./Opinion.al

Pas