Socialistët që kanë qeverisuar deri më tani në Spanjë kanë fituar më shumë vota gjatë zgjedhjeve të së dielës, por kanë humbur shumicën, meqë partitë e krahut të djathtë kanë shënuar fitore të mëdha.
Partia Popullore konservatore është renditur e dyta dhe partia e të djathtës ekstreme, Vox ka fituar më shumë se dyfishin e votave në krahasim me zgjedhjet e kaluara, duke u shndërruar në partinë e tretë më të fuqishme në këtë shtet.
Këto kanë qenë zgjedhjet e katërta që janë mbajtur në Spanjë gjatë katër viteve të fundit.
Një procesin zgjedhor të mbajtur në muajin prill, nuk ka pasur shumicë të qartë, për këtë arsye socialistët kanë dështuar që të formojnë koalicion qeveritar.
Këtë herë, socialistët kanë fituar 120 vende në parlament nga 350 në total.
Teksa u është drejtuar mbështetësve socialistë pas shpalljes së rezultateve, kryeministri, Pedro Sanchez ka thënë se është prioritet i tij që të “formojë qeveri të qëndrueshme dhe të bëjë politikë për të përfituar shumica e spanjollëve”.
“Dëshiroj t’iu bëj thirrje të gjitha partive politike, që të veprojnë me përgjegjësi në mënyrë që të zhbllokohet situata politike në Spanjë”, -ka thënë ai.
Pas dështimit për të formuar qeverinë, Sanchez kishte shpresuar se realizimi i zgjedhjeve të reja do të fuqizonte partinë e tij, mirëpo Pablo Iglesias, lider i krahut të majtë, Podemos, ka paralajmëruar se ky proces vetëm ka forcuar të djathtën ekstreme.
“Edhe një herë ne i zgjasim dorën Partisë Socialiste dhe Pedro Sanchezit”, -ka thënë ai, duke bërë të ditur se është i gatshëm për të nisur bisedimet me këtë parti.
Podemos është aleat politik natyral i Partisë Socialiste.
Megjithatë, një koalicion mes të dyja grupeve sërish nuk do të arrinte numrin e duhur për shumicë parlamentare.
Partia e të djathtës ekstrem, Vox, konsiderohet se ka përfituar nga situata në Katalonjë dhe nga ndjenja e fortë anti-separatiste në rajone tjera të Spanjës.
“Sot në Spanjë është bashkuar një mundësi patriotike dhe një mundësi shoqërore, e cila kërkon unitet kombëtar për rregullim të rendit kushtetues në Katalonjë”, -ka thënë lideri i partisë Vox, Santiago Abascal para mbështetësve të tij.
Rritja e shpejtë e partisë Vox, është kthyer në një prej pikave kyçe të diskutimit. Spanja është paraqitur imune para valës në rritje të popullizmit të së djathtës ekstreme në kontinent në dekadën e fundit, ndonëse ky vend është përballur në të kaluarën me diktaturën ushtarake të gjeneralit, Francisco Franco.
Mirëpo tani Vox ka krijuar idenë se është forcë e madhe në politikën spanjolle. Liderja e partisë të së djathtës ekstreme në Francë, Marine Le Pen ka uruar përmes një postimi në Twitter, partinë Vox për “suksesin e jashtëzakonshëm”./Opinion.al/
