Aktori James Franco ka pranuar se ka kryer marrëdhënie seksuale me studentet e shkollës së tij të aktrimit. Ky rrëfim i aktorit vjen pothuajse pas katër vitesh, pasi ai u akuzua për sjellje të pahijshme seksuale.
BBC shkruan se 43-vjeçari ra dakord të paguante 2.2 milionë dollarë në muajin korrik, pasi u padit për përfshirje në “sjellje të pahijshme ndaj studenteve femra”.
Duke folur në “The Jess Cagle Podcast”, ai tha se ndërsa jepte mësim, ai “flinte me studentet dhe kjo ishte e gabuar”.
Ai theksoi se nuk e kishte hapur shkollën për të joshur gratë për qëllime seksuale.
Aktori tha se ai kishte qëndruar i heshtur për akuzat në lidhje me shkollën e tij për vite me radhë, sepse “kishte njerëz që ishin të mërzitur me mua dhe unë kisha nevojë t’i dëgjoja“.
Sarah Tither-Kaplan dhe Toni Gaal, të cilat ndoqën shkollën e aktrimit te Franko, “Studio 4”, pretenduan se ai u përpoq të “krijonte një grupacion të vajzave të reja që i nënshtroheshin shfrytëzimit të tij seksual, personal dhe profesional, në emër të edukimit“.
Në këtë rast, studentet pretenduan se ishin viktima të mashtrimit për të paguar shkollën e aktrimit, ndërkohë që ishin objektivizuar dhe frikësuar seksualisht.
Aktori tha se ai ishte në shërim nga varësia ndaj seksit që nga viti 2016 dhe kishte “bërë shumë punë” pas akuzave kundër tij, për të ndryshuar veten.
Franco u nominua për aktorin më të mirë në Oscars në vitin 2011 për rolin e tij kryesor në 127 Hours, me regji të Danny Boyle, dhe është gjithashtu është i njohur për rolet e tij në Pineapple Express dhe filmat Spider-Man./Opinion.al
