Rezultatet e një studimi konfirmojnë se kalimi i tepërt i kohës në mediat sociale është i dëmshëm për shëndetin tuaj mendor, por një detoksifikim social njëjavor është i mjaftueshëm për t’u ndjerë më mirë.
Në vitet e fundit, studime të shumta kanë shqyrtuar lidhjen midis mediave sociale dhe shëndetit mendor, duke arritur pothuajse gjithmonë në të njëjtat përfundime, se zvogëlimi i kohës që kalojmë në Instagram dhe TikTok mund të jetë vetëm i dobishëm.
Një studim i ri i botuar në “JAMA Network Open” ka arritur në të njëjtat përfundime, duke gjetur një zvogëlim të simptomave që lidhen me pagjumësinë, ankthin dhe depresionin tek të rinjtë që zvogëluan kohën e kaluar në mediat sociale për një javë.
Në studim morën pjesë 295 vullnetarë të moshës 18 deri në 24 vjeç. Për të shmangur paragjykimet në rezultate, sikurse studimet e mëparshme të bazuara në të dhëna të vetëraportuara, autorët vendosën të përdorin një metodë të quajtur fenotipizim digjital. Pjesëmarrësit gjurmuan në mënyrë pasive kohën e përdorimit të aplikacioneve përmes telefonave të tyre dhe ua raportuan rezultatet studiuesve. Pas dy javësh mbledhjeje të të dhënave, të rinjtë zvogëluan kohën e kaluar në mediat sociale për një javë: 6.2% bënë një detoksifikim total, duke mos përdorur asnjë aplikacion të mediave sociale, ndërsa përdorimi i tyre mesatar u ul nga pothuajse dy orë në gjysmë ore në ditë.
Gjatë studimit tre-javor, pjesëmarrësit monitoruan shëndetin e tyre mendor përmes vlerësimeve të shkurtra ditore në kohë reale. Detoksifikimi social njëjavor rezultoi në një ulje mesatare të simptomave të ankthit me 16.1%, depresionit me 24.8% dhe pagjumësisë me 14.5% . Ata që ishin më të varur nga aplikacionet e mediave sociale përfituan më shumë dhe shëndeti i tyre mendor u përmirësua edhe më shumë pas detoksifikimit njëjavor. Sipas autorëve, përfitimet nuk janë aq shumë për shkak të uljes së kohës para ekranit, por më tepër për shkak të uljes së inputeve negative që rrjedhin nga mediat sociale, si krahasimet sociale me të tjerët (që duken më të pasur, më të bukur ose më inteligjentë) dhe përdorimi kompulsiv.
Edhe pse studimi ka disa kufizime, siç është fakti që pjesëmarrësit u rekrutuan vullnetarisht (dhe për këtë arsye ka të ngjarë të ishin të vetëdijshëm për rezultatet e pritura) dhe se ata nuk u ndoqën për një kohë të gjatë ose nuk përfshinin një grup kontrolli, rezultatet konfirmojnë dëmet që lidhen me abuzimin në mediat sociale.
